截至周四下晝，標普500期貨由高位下跌23%，最近3星期美股進入08年金融海嘯以嚟最大跌市，但同08年海嘯
非常唔同，海嘯前美股經歷咗為時大半年嘅漫長派發期，然後先大跌，今次美股擺明係尖頂下跌，大戶派發過程根本未完成。
美股係全球最成熟市場，表面係武漢肺炎疫情打擊股市，更大理由係升幅多、估值高、呈超買。大家本來對美國經濟半信半疑，點知有個疫情令大家更確信美國經濟會出現衰退，配合美股高估值，於是失去支持。
正正因為美股係一個超成熟市場，好難冇經過派發而完結大牛市。武漢肺炎總算突如其來，但談不上損害經濟長遠基本因素。回想87股災標普500指數都係兩三星期跌35%，現時市場更成熟，三星期跌23%已夠誇張，中線較大機會慢升去到前高位附近，有乜理由升去呢個位？疫情見頂就得，呈現雙頂再進入熊市。港股近期已算硬淨，二三線股跌幅遠遠不及08年海嘯或2015年大跌市，去到市賬率1.055倍嘅歷史低位水平，似築起護城河。資金由美股流出，加上拜登較大機會成為特朗普對手，有利中資股，資金稍後流去超低殘港股機會唔低，今年餘下時間，唔好睇小中資股。呢一刻寧願展望將來好過。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com
