論香港樓市
近日跟本地相熟中介閒聊，他說過年後不知幾忙，我當然問下詳情睇下有冇吹水之嫌。他主要做豪宅市場，客路為內地人，意料之內，內地客已經變零，而四、五千萬的「半豪宅」也有減價貨出現，一減減一千萬，聽落減好多，但通常這類業主都覺得自己間樓獨一無二，加上放盤量少，故通常比同屋苑成交價
開高兩至三成，現在只是回歸現實而已。當然，這類放盤個案如落在財經版記者手上，就成為明日標題「業主財困減過千萬求售」。
另一批在市場上出現的新買家，是用「林鄭plan」的八、九十後年輕高薪一族，主攻一千萬以下「上車盤」。這類買家通常是專業人士，而且使費較大，儲不到過百萬首期，但有供款能力，普遍target蚊型單位，設有豪華會所靚靚大堂的新盤，好似白石角海濱幾個新盤放賣，只賣剩天台與最低層，實用三百幾呎折實二萬幾蚊一呎嗰種。
有用家問究竟現在是否入場時機？這時候，實有人話家陣入市實死無生，經濟差、疫情問題、社會運動、中小企結業潮，從而引發失業率上升等客觀因素是事實。但另一方面，聯儲局一月內減息至零厘，重啟量化寬鬆政策，各國受疫情影響經濟，勢必效法，加速銀紙貶值，加上供應不足，發展商毋須減價促銷亦可賣光，足夠證明市場實力，而且是在不靠中國資金的情況下。這是十幾年來樓市的財富效應導致，優劣勢相交，經濟差，貧富差距擴大的樓市，小弟堅持看法三年至今，升跌不會多於兩成，用家平市價兩成可考慮入場。
作者為《HEA富學》作者，Finsight ED founder
www.finsight-ed.com
https://www.facebook.com/heaology.edu
HEA富專欄 - 郭釗 舊文
來源 source: http://www.am730.com.hk
