滙控（005）突然宣佈撤回去年度末期息，兼預告今年度不派季度及中期息，股價早前已除淨，去年業績亦已
講咗首季派息0.1美元，如今全部落空，難怪股民怨聲載道。這些除淨後彈弓手個案，以往多在妖股身上出現，如今大笨象變妖象，只剩下雨中感嘆號。
臭朵還臭朵，滙控魔力依舊，昨日不斷有血肉長城在左邊頂住。好多人問撈唔撈得過，我只能夠話，滙控的賣點只有派息，如今呢個「優勢」都冇埋，仲係咪值得同佢長相廝守？記住買股票要毋忘初衷，當形勢有變時，一定要狠心分手。如果想知多啲有乜收息股代替滙控，今日中午記住睇蘋果午市急Call，屆時股榮同我會同大家分享心水股。
上星期二午市急Call推介錦欣生殖（1951），給予目標價9.1元，昨日超額完成，一星期有兩成回報，可喜可賀。公司最新宣佈擬回購最多2.38億股或10%股權，主要由於現價未能反映內在價值及實際業務前景。事實上，全年盈利勁升98%，加上業務概念獨特，理應大炒特炒，但由於市況奇差，股價竟較高位跌去近半，實在無辜，只要回購切實執行，有望令股價重返合理值，昨日逆市造好，合情合理。
唐牛
http://fb.com/tongcow88
本欄逢周二、四刊出
魚樂無窮 - 唐牛 舊文
來源 source: http://hk.entertainment.appledaily.com
