金融High Tea——滙控大平賣 撈貨要諗真
大市昨日最熱話題，係滙控（005）同渣打（2888）喺開市前宣佈取消派息，拖累兩股股價即時大插，大市跟住都受到衝擊，恒指回落517點。
兩大外資銀行股因為取消派息下插，反映小股東有點突然，意外之下決定沽貨。在此之前，英國
《金融時報》已有報道，滙控董事局曾經開會研究過是否暫停派息，最後決定等監管當局通知。
挑戰在前 息竟變空
中環茶友話，新冠肺炎侵襲西方，英國的佛系抗疫證明完全失敗，成為重災區，喺經濟受創程度未明下，銀行作為百業之母，必然想留多個錢傍身，加上滙控表明因為肺炎疫情，要拖慢裁員及放緩出售資產計劃，要維持派高息都唔易。現在監管當局「識做」叫銀行停止派息，減低由銀行自己決定停派的衝擊。為官不能避事，英國財金官員今次做「醜人」，拆了銀行資金壓力的炸彈，說明英國人抗疫唔得，但搞財金技巧始終有一手。
滙控之前公佈的業績麻麻，同時叫停回購計劃，派成績表後不少散戶組成血肉長城護價，主因管理層明言未來兩年會維持派息，大家睇住有七、八厘息，息誘下去做清兵，所以今次停止派息決定都幾震撼，仲要宣佈咗要派的2019年第4季利息都要收返無得派，認真慘情。
滙控財務總監邵偉信在電話會議中就話，明白股息對股東重要性，故會盡快恢復派息，但現在不能承諾日後會補派所有股息予股東，須有待今年較後時間討論派息政策時再作決定，當疫情持續多久及經濟所受影響，將是關鍵性因素。
現在不派息的「壞政策」由監管機構決定，滙控管理層壓力大減，滙控普通股權一級資本比率（CET1）因為保留股息增加100點子，去年的CET1為14.7%，數字上睇算係強勁，但係全球經濟下滑，銀行呆壞帳會否增加？滙控原本計劃透過出售資產收縮帳簿，同時大力削減員工，這些計劃現在都無法即時進行，對資本需求有甚麼影響呢？所以監管機構同銀行管理層上演呢幕「臨陣不派息」，其實可以理解。相反，如果勉強派息後經濟下滑，隨時要吹雞供股都唔出奇，所以現在買高息股，都要留意派息的靭力夠唔夠。
滙控今次因為英國監管當局介入叫停派息，有人話滙控若回流香港，這個情況就不會出現，日後大笨象會不會好似避疫港人一樣，要求返港聲音增加呢？滙控回流說法傳了無10年都有8年，近年講得比較多，有滙控高層話本來這個想法都有不少好處，交少啲稅可以考慮，但自從幾個月前發生火燒總行獅子後，本地政治環境變得不穩定，又令機會下降了。
滙控、渣打不派息的震盪全日都未散，雙雙跌穿40元關口，渣打收報39.9元，大跌7.6%；滙控收報39.95元，跌幅更達9.5%，成交額去到86億元。市場擔心恒生（011）有樣學樣，股價都插近4%，報127.3元，搞到恒生要出面澄清無意更改派息政策。部份愛揸銀行股的資金轉投中銀香港（2388），收報21.7元，逆市升1.2%。
滙控大跌後有茶友問好唔好撈底博反彈？無可否認，滙控股價係跌到好平，但現在平股通街都係，之前滙控係靠息誘，現在變成息即是空，將來憑甚麼扭轉弱勢呢？如果手頭有股綁住都話要沽太遲，若然無股又是否需要上船呢？之前陸羽仁講過全球大減息，銀行板塊必然面臨息差收窄，經營環境好有挑戰性，所以落注前真係要諗清楚。
特朗普預告疫情得人驚
喺銀行股腳軟下，恒生金融分類指數大跌2.9%，恒指次季開局一度插655點，至22947點，收報23085點，急挫517點，成交增至1312億元。超過40隻藍籌股向下，中信股份（267）急跌5.4%，收報7.67元；除了中銀香港外，煤氣（003）逆市上升0.8%，收報12.88元。內房巨企恒大（3333）計劃每年減債1500億元人民幣，股價逆市彈1.6%，收報13.06元。美國總統特朗普預告未來兩個星期疫情會好得人驚，呢句話投資者亦都不能忽略。
陸羽仁
金融High Tea - 陸羽仁 舊文
來源 source: http://hd.stheadline.com
