滙豐控股（005）史無前例咁唔派息，背後原因係英倫銀行要求銀行暫停派息留錢備用，武
漢肺炎令全球政府可以用緊急嘅名義，嚟擴大對企業的控制。未來政策風險，首推「限租令」，即係租金管制。
特首林鄭月娥喺社交網站度話：「面對冷清的商場、人流稀少的店舖、租戶的欲哭無淚和員工的徬徨焦慮，難道業主只因手握一紙租約而無動於衷嗎？」回顧近期抗疫政策推出前後，首先都係放風，例如先認定歐美疫情更嚴重，之後就禁止非香港居民入境；覺得人多會有風險，就禁止4人以上聚集；有患者懷疑喺蘭桂坊染病，然後林鄭就先講限酒令，後下令餐廳人數減半，再將酒吧卡拉OK等停業。以此推論，現時放風針對租金，下一輪好快到政府逼業主減租甚至免租。千祈唔好高估現屆政府嘅思維，覺得「唔會嘅、冇法律基礎」。
疫情令人減少出街及保持社交距離，其實已非租金問題，係冇生意嘅問題。下令餐廳座位減半同大部份行業停業，係佢決定嘅，要業主埋單嘅話，隻鑊都卸得幾快。一早封關及鼓勵戴口罩，疫情可能會更加受控，類似留學生回流前嘅香港，至少有本地生意做嚇。
對地產股嘅影響，首當其衝，一定係房託，依賴租金收入去派息，如果政府推出限租令，有效期肯定唔會係14日，至少都會係3個月，最長可能係逼令業主疫情過渡前都要跟政府要求減租，即18個月嘅疫苗產生期，即時影響領展（823）、置富（778）等房託嘅租金收入，影響力比滙控唔派息更大，因為減息派之餘，收入真係少咗。之前講過，每次金融危機見底，必定係退休人士份退休金嘔返出嚟。房託係好多人將退休金儲存嘅地方，估唔到，最大風險唔係生意危機，而係人為嘅政策危機。
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://hk.entertainment.appledaily.com
