有冇發現大孖沙最愛收購咩業務？係保險。股神畢菲特早年就係靠玩保險股發圍，而香港的大孖沙似乎好認同
，李澤楷在2012年向ING保險收購香港業務，兩年前新創建（659）都斥逾200億收購富通保險，而馬雲亦在3年前用旗下雲鋒金融（376）收購萬通保險之亞洲業務，可見此行業極之吃香。
雲鋒金融當年牽頭中字輩，用131億港元收購萬通，當中雲鋒佔60%，其餘除了GIC外，其他都是馬雲的富豪死黨，當中有52億元，雲鋒係發新股支付，作價係每股6.5元，換言之交割後，美國萬通持有8億股，即24.8%股權，相信美國佬現在都相當後悔喇，因為現時股價只剩下一半，去年底雲鋒再向死黨收購萬通的股權，現時已增持至69.8%。
雲鋒股價近年乏善足陳，但其實萬通的業務相當硬淨，去年保費收入按年增長41%，幫助公司扭虧賺2.5億元，現價跌得殘，市賬率只有1倍，不過睇保險股最應睇內含價值嘅。按業績顯示，現時係165億元，雲鋒現時市值101億元，即使你扣除少數權益去計，股價對內含值都不足1倍，龍頭友邦（1299）係1.8倍啊，現價既落後又低殘。再睇多個數字，當日斥資收購萬通時，以價格對內含價值比率為1.18倍，去年底向死黨增持股權的作價，只有0.98倍，真係死黨都要蝕讓畀馬雲。
以雲鋒的過百億市值，本應是在港股通標的之列，不過成交疏落，流通量成交不足，所以仍未被選入恒生綜合指數，咁有乜方法搞旺個場呢？青冰翻查新聞，去年馬雲及虞鋒在出席萬通新品牌發佈會上講過，他們不追求急速發展，3年內打好基礎，之後就快速發展，咁今年正是收購後第3年喇，加上同螞蟻金服份屬姊妹，業務有協同效應，將是今年發圍的大方向。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.entertainment.appledaily.com
