金融High Tea——政府派錢勿急追消費股
美股炒疫情見頂，炒咗兩日就頂唔順，隔晚美股高開近千點，跟住升幅不斷收窄，最後輕微回落收市。港股兩日彈升千點後，昨日回調至24000點樓下。目前全球疫情仍然未明，就算大市見底，要炒疫情見頂都有個限度，恒指要一口氣升上去，想想都不
符合現實，所以就算有錢想長線投資，都宜候低吸納，或者分段買。
政府推出第二輪抗疫基金，早上傳出涉及金額逾千億元，仲有可能代支部份薪酬，消息推動多隻本地消費股逆市彈出，餐飲股太興（6811）抽升6.25%，收報1.19元；大家樂（341）炒高5.6%，收報15.04元；快餐帝國（1843）漲5.4%，收報0.235元；味千（538）彈3%，收報1.79元；大快活（052）上升2.8%，收報16.86元。百貨股中，先施（244）彈6%，收報0.265元；歐舒丹（973）揚2.4%，收報12.08元。
政府派福利 港鐵荷包傷
收市後特首林鄭月娥宣佈方案，補貼企業員工一半薪酬，上限每名僱員補貼9000元，為期6個月；另外又對特別傷的行業有額外補貼，呢一輪抗疫基金大灑金錢1375億元，預期會有一定效果，主要作用係減少裁員，既然政府願意津貼員工一半薪酬半年，僱主如非頂唔順，可以不裁人就不裁人。
如果本來都唔打算裁人的公司，政府補貼減少開支，可以彌補一嚇無咁傷。所以新措施理論上對所有本地公司都有點幫助。不過由於僱員只是唔失業，唔係直接有更多錢落袋，所以無誘因增加消費，所以我睇唔到消費股可以持續炒。
另外一個新措施炸中港鐵（066），政府宣佈會由7月1日起減港鐵車費20%，當中一半支出由港府承擔。雖然係咁，港鐵都收少10%車費，荷包都好傷，加上之前減租等措施，小股東唯有希望政府喺批地同新線安排會投桃報李啦。
第二輪抗疫基金大灑金錢，再拋1375億元，全年赤字會超過2600億元。雖然政府學西方大灑金錢，但估計短期市道唔會一帆風順。
喺政府救市聲中，中美股市回調，恒指跌穿二萬四關，收報23970點，回吐282點，成交金額縮減至945億元。喺美股炒上炒落之際，近日出現一個現象，就係在華爾街掛牌的中資概念股，接連爆出負面消息，昨日又輪到愛奇藝被渾水狙擊。
神車反彈後再急跌
今次被狙擊的愛奇藝，由大股東百度持有56%，香港上市的小米（1810）都持有愛奇藝6.7%。據沽空機構Wolfpack Research聯同渾水爆料，指愛奇藝早在2018年IPO前已犯欺詐行為，無法合法擴展業務，估計愛奇藝將去年收入誇大約8至13億元人民幣，即27%至44%。愛奇藝回應，關於第三方機構發表質疑愛奇藝的報告，其引用數據與結論嚴重失實，與實際情況不符，作為負責任的上市公司，披露所有財務和運營數據均是真實的，符合美國證監會要求，將會保留法律追究權力。愛奇藝股價一度跌11%，其後跌幅迅速收窄，收市更倒升3%。小米昨日則收報10.18元，跌3%。
愛奇藝是近日爆出負面消息的第三隻中概股，之前有瑞幸咖啡和網校學而思。瑞幸在內地大量燒錢發展，成為星巴克最大對手，其營運模式一直有爭議。這次被狙擊之餘，因為在港掛牌的神州租車（699）大股東陸正耀亦是瑞幸咖啡大股東，拖累神州租車股價亦急跌停牌。神車其後急急澄清與瑞幸沒有業務往來，股價復牌後急彈，收報2.63元，不過昨日股價又再跌過，收市報2.18元，回挫17%。美國市況波動，在亂世之中最宜沽空搵食，故此沽空機構頻頻出擊，不排除會陸續有來。通常內地民企老闆都會四出投資，所以買民企股都要小心沽空機構亂扣帽子，到時會殃及池魚。
中概股在美國接連出事，中環茶友話對港交所（388）都有影響。港交所近年一條水就係食中概股回流，現時中概股不斷被狙擊，可能引發更多回歸，有利好作用，港交所坐地分肥必然受惠，所以個市跌了不少，這隻股都無平貨執。
陸羽仁
金融High Tea - 陸羽仁 舊文
來源 source: http://hd.stheadline.com
