【中環在線】政府派錢都要抄誠哥 - 李華華
話說誠哥舊年想派錢，原來都聯絡過財爺陳茂波。
政府「保就業計劃」預備派錢，請咗會計界Big 4之一羅兵咸做代理人，兼且搵埋長和（001）有份投資嘅生活易建立網上申請平台，無獨有偶，呢兩間正正係誠哥舊年派10億「應急錢」時搵過嘅公司，唔通誠哥
做咗政府「派錢顧問」？基金會只能同華華講，兩間公司喺「應急錢」計劃嘅時候真係有合作過。
華華八到當日誠哥派錢嘅構思點嚟。話說誠哥舊年一有呢個諗法，就即刻聯絡咗財爺陳茂波，希望出錢畀政府幫中小企。點知等咗兩個禮拜，波叔畀咗個counter proposal，想派券多過派錢，誠哥於是就決定自己搞，佢當時仲「恐嚇」團隊話項目做唔到會有後果，而可接受嘅誤差範圍係5%。
聽聞最終出錯率好低，行政費亦少過100萬元，唔知係咪因為咁，政府就照辦煮碗「抄考」，搵埋誠哥當日嘅合作partner幫手。
李華華
mailto:LiWaWa@AppleDaily.com
中環在線 - 李華華 舊文
來源 source: http://s.nextmedia.com
