【收市閒情】I.T「999」 ＝ 撐警代號 - 千頌C
以前見到沈嘉偉，會諗起潮牌同邱淑貞；今日見到沈嘉偉，同場加映譚伯、曾志偉同鄧炳強。 資料圖片
想當年2005年2月，I.T（999）上市，全城哄動。一來有明星效應，邱淑貞做老闆娘；張曼玉係股東兼IZZUE設計總監；二來，思捷（330
）同期公佈咗份勁靚業績，成為I.T招股助力。
潮牌有潮牌嘅格調，股份代號「999」係捐100萬畀公益金自訂；上市記招喺蘭桂坊搞；全場工作人員著件「999」白tee。型人型格型number，結果呢三條九，超購872倍。當時條街更加吹奏一個願景：沈嘉偉將會係下一個邢李㷧。
星期一fb寫專欄，嘗試討論沈嘉偉食一餐撐警飯，為I.T換來幾大代價？本來係預期全年輸3億，點知事別一日，就話其實要輸7億。
到底I.T係幾時開始想放棄香港市場，答案係：根本一早就想！想當年香港起家，招股時話98%生意來自係香港；不過有資金開拓，好易就諗去搵大陸錢。於是，2012年，香港業務比例縮到六成，中國則為三成。此後幾年，雖然I.T業績越來越差，開始慢慢轉移重心，北上賺easy money。直至2017年，中國貢獻超越香港後，生意又真係開始有起色，盈利重新錄連續增長，到現時中港收入貢獻，分別係46%同36%。咁你明白，一個人的愛國心，好多時只係由一種原料推動：係人民幣。I.T身體力行食撐警飯前，早已用業績表心跡，逐步放棄香港年輕人。
係邪嘅，當年上市，有記者問公關點解用「999」，當時解釋係長長久久；想當日嘅潮流代號，變成今日嘅撐警代號；以前你見到沈嘉偉，你諗起潮牌同邱淑貞；今日見到沈嘉偉，雖然都仲會諗起沈月，但同場加映譚伯、曾志偉同鄧炳強。大佬呀！咁點買得落！
由Joyce、思捷（330）、先施（244）、Bossini（592）、到I.T；由百年老字號，到快速崛起的本地潮牌；每一個都代表香港人不同時代的個性與特質。不過，半年內一個接一個失色、甚至倒下、染紅；彷彿意味，2020年就是一個大清洗的年份。不出十年，冇幾多人記得以上牌子，係曾經代表香港人輝煌的故事。
千頌C
http://fb.com/winbigwok
本欄逢周三刊出
收市閒情 - 千頌C 舊文
來源 source: http://s.nextmedia.com
