【創業起義】創業者根本係survivor - 尹思哲
當美國刻意將生產線撤出中國，就近墨西哥自然係最佳選擇之一，未來幾年美墨嘅跨境物流一定有增無減。 資料圖片
朋友圈消息，創辦人S進軍墨西哥同美國德州，專搞跨境物流，不得不讚嘆，商人觸覺嘅敏銳。
眾所周知，香港成了美中磨心，至有國安法出
台。唔少人都相信，特朗普最近嗰次講話，取消香港獨立關稅區地位，根本不是主菜，因為香港每年而銷往美國的產品，貨值僅4.7億美元，佔整體出口貨值約0.1%。幹擾中國透過香港吸外滙，至係佢嘅重點。
曾經有位前輩同我講，佢當年喺大陸開廠，當時一樣有關稅，但問題係，做廠處於食物鏈下遊，賺得一個幾毫，大部份利潤去咗上遊嘅美國入口商。你以為關稅由廠商埋單，梗唔係，大部份情形係轉嫁番畀美國入口商。呢位前輩仲話，美國商人好精明，要解決關稅成本，方法多的是，例如啲貨櫃，先走一轉墨西哥處理加工，然後至運入美國，好多問題，其實就已經搞掂。
大家唔好誤會，我唔係話創辦人S間公司，去做非法勾當。事實上，當美國刻意將生產線撤出中國，就近墨西哥自然係最佳選擇之一，未來幾年美墨嘅跨境物流一定有增無減。
創辦人S喺中國都有唔少生意，可以食曬兩邊茶禮。我同佢都有一點交情，佢一早上曬岸，當初搞呢盤生意，真係抱住一個夢想。記得佢咁講過「成世人可能就一個機會，無理由唔好好把握」。𠵱家睇番，創辦人S咁多年嚟嘅成績，我反而覺得佢發嗰個夢，其實一早已經醒咗。
當中港經濟開始步入下行周期，當中港兩地嘅VC都開始收水，現實係佢公司或需要現金流，或需要向投資者交數。人肚餓自然會識得瞓醒，創業者根本都係survivor，其實佢只係想生存落去。
尹思哲
http://linkedin.com/in/wanszezit
本欄逢周三刊出
創業起義 - 尹思哲 舊文
來源 source: http://s.nextmedia.com
