八十後投機客 - 灝昇 2020年6月5日
【八十後投機客】炒股切忌對著幹 - 灝昇
港股近期強勢，現價強行搵位造淡，大多只是因為「覺得」升咗好多而「包拗頸」的逆勢行為。 資料圖片
最近收到最多戰友的問題並唔係追唔追貨，而係如阿里巴巴（9988）、騰訊（700），指數似乎到咗阻力，應否造一造淡？這些問題反映提問者背後好倉不多，甚至錯失升浪。
細看港股今次升浪，和一個月前有很大分別，一個月前此欄指出，是次熊二反彈和以往不同，資金明顯未開始risk on，未有流入不同板塊和落後股份中，只流於買入新型避險強勢股份，如物管、科技等可預測性高的股份。但一個月後的今天，在國安法影響市場氣氛下，卻見到不同板塊中都有明顯資金流入，例如內房、平保、濠賭等，亦突破5月高位，甚至個別二至三線股都明顯見到資金下注，同樣節節破頂，整體升幅比5月更顯著、更全面，而且二三線股見資金流入，反映市場開始risk on。
在risk on下，個股、板塊逐隻爆，在5月先行一步的科技、生科、醫療、物管等反倒先唞一唞，追一追其他落後，當炒到咁上下，這些先唞唞等強股隨時一下突破向上，所以現時對著幹造淡，只能博小回，盈利空間有限，但一旦資金回籠，隨時突破大升，虧損空間卻很大，值博程度不高。現價強行搵位造淡，大多只是因為「覺得」升咗好多而「包拗頸」的逆勢行為，而順勢而為的方法現時仍應持有個股好倉，博一突破之後展開另一升浪，畏高的處理方法最多只是提高現金比率，而非淨做淡倉，只要不是滿倉，在這音樂椅遊戲完結前仍有獲利空間。相反淡倉則應待各板塊都炒過後，資金再落一層去到三至四線股，才開始部署未遲。
灝昇
http://fb.com/speculatorjunior/
本欄逢周五刊出
八十後投機客 - 灝昇 舊文
來源 source: http://s.nextmedia.com
