【笑到最後】真正5G股只得兩隻 - 高明
5G將會成會未來十年政府力推嘅項目。 資料圖片
美股因失業數字大挾，但收市後公佈，失業率由原來的13.3%向上修正為16.3%，仍較預期嘅19%為佳。而中國「地攤經濟」一放一禁亦引發就業嘅聯想。
印多咗錢後，大家要習慣一個新常態，就係失業率雙位數
係正常。失業率係零售消費最好嘅秤，過去十年，直接接觸到最終用家嘅股票升得最多，蘋果、阿馬遜、Tesla等等，不論中美，最終用家嘅人數因失業新常態而縮小，未來十年仲有咩可靠收入來源？就係靠政府，兩大項目，政府一定力推：5G同武漢肺炎藥。
武漢肺炎藥研發者眾，有機會再討論。相對疫苗，5G嘅投資範圍窄得多，做基建得三隻：華為、愛立信同諾基亞，更重要係華為冇上市，所以選擇更少。政府批出嘅合約，未來幾年肯定有穩定收入來源。對穩收入有幾渴求，睇下看更股炒成點已知。坊間講5G優點，一味講速度，另一重點係多人用而唔窒機。有DSS即刻可以4G網絡兼容5G，喺未有5G iPhone之前，漸進過度5G較合理。至於冇DSS嘅系統，等同立即設5G做專線，機樓要夠密先可以維持流量，又有成本嘅問題。
情況有如泳池，5G原意就係有好多條快線，DSS就係原先個池擴闊，遊得快就去條快啲嘅線；冇DSS就喺隔籬挖個快線泳池，快線池開得唔夠多線，焗住爬上岸再返去舊池遊，最後舊池都塞。5G iPhone就係菲比斯，菲比斯未訓練到，快線池挖有成本問題，挖得唔夠大，又做唔到快線。再睇返本文第一段咩環境？所以各地政府電訊商突然轉軚。
正如高明3年前大聲疾呼，炒蘋果概念股不如買蘋果，今日一睇股價就知邊個係先知。今日人人講5G概念股，真正有上市嘅5G股其實只得兩隻。
筆者為證監持牌人，持有蘋果及阿馬遜
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://s.nextmedia.com
