【佬訊專欄】喂，我可以點食飯？ - 佬訊
政府連堂食都禁埋，需要食飯嘅，除咗踎喺街食之外,仲可以去公園或開房食。 資料圖片
最近好多朋友問我，喂佬訊，政府連堂食都禁埋，冇得work from home的打工仔，應該點食飯？首先，佬編代政府問大家一個基本的問題，點解你要食飯？覺得YouTube廣告
好煩，你可以quit YouTube，同理，疫情之下，大家可以quit食飯，光合作用就可以了。雖然市面上仲有大量免檢疫的中港司機、船員通街走，但食肆無曬堂食，市民忍一忍唔好食飯，一定可以早日戰勝疫情的。
But in case你真係需要食飯，而公司又不准飲食，咁又可以點做？Well，恭喜你，過去多年苦練的深蹲，今次終於大派用場。在卅幾度高溫之下踎喺街邊食飯，不單止考驗體能與耐熱能力，更是對腳力、core、背肌，以及下身柔軟度的終極考驗。
當然，踎喺街食飯除了考驗體力，亦是精神力及恥力的試驗，未必是所有人都能接受得到的。如果你不想踎街，可能就要考慮找個公園，但不少大熱公園，在上星期禁晚市時已有爆滿的跡象，諸君去到自己執生。
手頭寬鬆一點的，建議直接開房食。這個option，佬編也是最近才受啟發想到的，平時開房通常都冇時間食飯，但大家應擴闊對開房的想像。Daytime booking通常都起碼兩粒鐘，食得快的話，仲可以瞓晏覺。豪爽一點的，甚至可以在公司/工作地點附近長期book間房，反正現在酒店房也不算貴，還可以lunch time帶個相宜的同事返房一齊食飯。講嚇講嚇，佬編都開始肚餓了，有冇靚女可以借間房一齊食飯？心急，在線等。
佬訊
http://fb.com/loshunhk/
佬訊專欄 舊文
來源 source: http://s.nextmedia.com
