【收市閒情】為國慳錢 拆產業鏈 - 千頌C
毛主席曾表示，「貪汙和浪費是極大的犯罪」。
國安法來了，唔少人驚到瀨屎，我本來都有少少憂慮，諗住Google本《毛語錄》背幾句傍身，發現字字珠璣、句句精闢，好似「哪裏有壓迫，哪裏就有反抗」、「人民，只有人民，才是創造世界歷史的動力」，頓時感到
黨的偉大和溫暖，直到見到：「貪汙和浪費是極大的犯罪」我頃刻醒了，其實一國一制也好處一籮籮！
大家要知道，任何工程項目都可以衍生一條產業鏈，當然包括選舉工程。過去建制派為咗與香港各區居民建立良好關係，不惜大灑金錢推出「蛇齋餅糭」套餐，又不時搞蝕本旅行團……作為一個民選政黨，用錢搞marketing當然是必須呢！不過，一國一制下，仲使乜鬼選？背後一堆供應商，每年來自建制派的穩定大額收入，自然沒有了……
另外，每次選舉都花費大量人力物力，聯絡「乜乜物物同鄉會」互相協調……即係咁，開會自不然食飯，食飯又自不然使錢，引伸落去，協調都要成本（我講時間，因為時間就係金錢）；選舉當日，仲要call車接公公婆婆落去票站、搵咩咩研究協會做民調。單係講到呢度成本，都分分鐘係天價。假如沒有選舉，以上所有錢都可以慳返了。
議會少了嗰批反中亂港份子，全部議案秒速一致通過。反正得一把聲音，從此不用花費搞公關工程去做lobbying，建制派開支自然大幅削減。
少了搞亂香港的聲音，就更加唔使請「五毛」；連最勤力讀報的前特首689，都唔使課金訂閱mon廣告！天啊！只要一國一制，貫徹落實執行，以上開支一筆慳，在「斷捨離」潮流下，反動勢力衍生的龐大產業鏈一次過瓦解，真的很治癒呢！毛主席曾號召大家「節省每一個銅板為著戰爭和革命事業」，在一國一制的偉大願景下，一次過炒曬班既得利益集團，在創立和建設新香港的歷程中，譜寫中國香港歷史上最壯麗的篇章。
千頌C
http://fb.com/winbigwok
本欄逢周三刊出
收市閒情 - 千頌C 舊文
來源 source: http://s.nextmedia.com
