【大茶飯】王維基搞外賣會殺價嗎？（青冰）
【大茶飯】王維基搞外賣會殺價嗎？（青冰）
王維基往日以殺價超人姿態進軍IDD及電訊行業，相信作為外賣app的後來者，要挑戰幾大前輩，初頭一定大灑金錢爭客。更多
香港電視（1137）在上周的業績公告中提及，將於9至10月時，推出外賣功能，目標有3,000
間餐廳加盟，青冰作為經常叫外賣的顧客，聽到此消息就十分雀躍，因為王維基往日以殺價超人姿態進軍IDD及電訊行業，相信作為外賣app的後來者，要挑戰幾大前輩，初頭一定大灑金錢爭客，青冰應會受惠，哈哈。
疫情持續超過半年，相信不少人都像青冰，食多咗好多外賣，而小弟主要都係幫襯兩間外賣app，亦是其中一間的月費會員。先講foodpanda，母公司Delivery Hero總部設在德國，成立約有9年，翻查紀錄，都是靠收購合併壯大，在2016年買入foodpanda品牌，現時在超過四十個國家提供外賣速遞服務，而品牌名並不統一，唔同國家都有唔同名，2017年在德國交易所上市，而剛剛的8月份，取代因做假賬而暴瀉的Wirecard，成為DAX成份股，今年累積升幅有28%，唔算太犀利，但從3月的底位比較，都算曾經倍升嘅。
Deliveroo是一間英國公司，服務地區不足15個，營運能力似乎較一般，按外電引述，在2020年初，仍是做一單蝕一單，不過最巴閉的就是去年的G輪融資，引入了全球最強的Amazon作為股東，現時持有16%股權，但去年的入股要輾轉搞到上個月，才獲英國監管批准，原因係怕入股最終會有損競爭，亦留下伏線，如Amazon要再增持，一定要再詳細審查，而今次獲批，唔多唔少都係怕Deliveroo會執笠，因為早前有傳，公司現金不足以營運至年底。
好喇，講完國際背景，都要貼地啲講本土嘢，由於係付費會員，青冰自然會幫襯Deliveroo多一點，但在客戶角度，都係覺得餐廳收費普遍較貴，而在港式選擇較少，青冰作為一介麻甩，耐唔耐都會想叫嚇點心食嚇茶餐廳，不過這方面明顯是foodpanda較優勝，不知道是否受所住地區影響喇。另外，Deliveroo不會讓客戶選擇距離太遠的餐廳，即使青冰覺得其實好近，相反早幾日在foodpanda搵食時，竟然見到一間5公里外的餐廳，當然運費都會貴啲啦。
料吸引小店加盟
記得以前同附近相熟的餐廳傾過，兩者對餐廳的分成都有大分別，可惜青冰老人癡呆已經忘了，戰友如知道的話，可去專頁分享嚇。單以堂食價錢，及外賣app的價來相比，20% mark up都屬平常，如果不是疫情的關係，相信不少顧客也不介意去自取的，因為20%的確係貴，唔知當HKTVmall加入後，會否顛覆這個玩法，讓客戶及餐廳都更受惠，而送餐方面，會靠自家的物流團隊，還是跟競爭者爭車手，都係一個有趣的課題，加上王維基本身的魅力，應會吸引不少小店加盟，令平時去打卡的年輕人，轉而幫襯外賣都未定。
青冰
http://www.fb.com/chingbing888
本欄逢周二刊出
大茶飯 - 青冰 舊文
來源 source: http://hk.finance.yahoo.com
