笑到最後｜拜登無力壓場對美股的啟示（高明）
笑到最後｜拜登無力壓場對美股的啟示（高明）
依家就算搵一班小學生，見到美國總統拜登入佢哋班房嘅話，都一定會自己玩同冇人聽拜登講嘢。
俄羅斯承認烏克蘭東部兩個地區獨立，港股、美期立即下跌。先前一日，美國白宮宣佈同俄羅斯總統普京有條件會面，話總統
拜登原則上同意與俄羅斯總統普京會面，令到美國總統日休市期間嘅美股期貨跌轉升，但白宮發言人又婆婆媽媽咁話，前提係俄羅斯不會進行侵略。結果俄羅斯話佢哋係獨立，背後意思即係獨立唔算侵略，美國行政機關點回應係一件事，美股期貨即時反應係下跌。
美股、外匯、加密貨幣免費即時報價，自選投資組合獲取相關新聞提示。
所謂「我討厭政治」，純粹講股票，打仗油價金價升升跌跌嗰啲等其他人講。呢度講霸權股，美國國力當然同霸權股有關。
古代西方列強開拓殖民地，透過船堅炮利攻打，對有啲地方侵略取得資源，對另一啲地方就炮打取得開放通商港以及在岸嘅根據地，以便上落貨同取得淡水。歷史上其中一次冇咁血腥嘅船堅炮利事件，就係日本黑船事件，美國艦隊派遣四艘艦船喺東京灣度「揖揖揚揚」，結果日本德川幕府政府開放港口通商。
現代投資霸權股雖然文明咗好多，但係霸權全餐離唔開船堅炮利，首先有強而有力嘅艦隊令到世界唔同嘅市場自願開放，背後有美國3.3億先使未來錢龐大消費人口交換，威迫利誘打開生意之門，然後霸權股先進科技同土炮科技進行競爭，贏家全取下帶嚟霸權股嘅增長動力。順帶一提，疫情前以為人口流動同自由通商係好正常嘅事，疫情來臨先發覺如果有國家要封關，就可以封關，自由流通原來係特權，而唔係必然，香港一眾渴望「返鄉下」嘅朋友應該明高明講乜。
本欄之所以倡議投資霸權股，因為乘咗他人之便，成套船堅炮利再配合創業家全天候博命，冇付出過嘅塘邊鶴就畀溢價去坐順風車，即係唔敢上哥倫布條船去開發新大陸，但又想要新資源，代價就係畀錢人做。
依家就算搵一班小學生，見到美國總統拜登入佢哋班房嘅話，都一定會自己玩同冇人聽拜登講嘢。成年人用語就係喺國際壓唔到場，緬甸、阿富汗、烏克蘭，一次又一次咁畀佢嘅交易對手睇低。
高明嘗試幫拜登行政機關講嘢，成班人以打工角度做嘢，冇咩嘢做錯：少做少錯、講咗當做咗、請假射波，壓唔到場又如何？月尾咪又係照出糧。大家打過工都知佢哋做啱曬，更何況三年後先再brief老闆選民，可惜個局勢唔同咗，如果換返奧巴馬年代全球有錢齊齊搵，可能拜登係個好總統，情況有如2021年美股繼續升。
塘邊鶴也要調整心態
更危險嘅係成個班底充斥住呢類官僚打工仔，當中最醒目嘅就係聯儲局主席鮑威爾，老細嗰邊想壓通脹，擅長睇眉頭眼額嘅鮑主席只會做多不會做少，國際形勢轉變嘅同時，可以預期佢只會好似一部官僚機器咁有柯打就直去，息口要加到拜登都驚先會停。
船堅炮利嘅源頭唔夠利，將會影響整個霸權股生態。當然，分析只係將壞情況諗到最壞，即使烏克蘭事件美國又輸一仗，根基都未動搖，但係呢一屆政府要擴張市場嘅能力睇嚟都好薄弱，換算霸權股增長嘅空間唔會特別大，船堅炮利都要食老本，我哋呢啲塘邊鶴都要調整心理。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
