操盤手劄記│中美審計傾掂數？（割柑人）
操盤手劄記│中美審計傾掂數？（割柑人）
中美雙方在中概股審計問題上爭拗不斷。
本欄上周一提到「快將出現孳息曲線倒掛」，轉頭就見美國5年期債息升越30年期債息，係2006年2月以嚟首次；翌日，2年期債息又升越10年期債息，係2019年8月以嚟首次
。債息倒掛，預示經濟衰退。近半個世紀，7次出現2年期同10年期債息倒掛，6次隨後出現衰退，分別係1978年8月、1980年9月、1988年12月、1998年3月、2005年12月、2019年8月，分別喺16、10、19、36、24、6個月後出現衰退，平均為18.5個月；由債息倒掛到美股見頂，平均為10個月。
美股、外匯、加密貨幣免費即時報價，自選投資組合獲取相關新聞提示。
上周五，美國公布嘅3月就業數據強勁，帶動債息再上，2年期、10年期、30年期債息分別收2.4625厘，2.389厘，2.435厘。2年期同10年期債息一周三度倒掛；2年期同30年期債息亦倒掛，係2007年以嚟首次。利率期貨顯示，市場預計聯儲局將會加大力度加息，5月、6月各加息半厘機會近七成，現時到年底再加息2.25厘機會逾五成，即年底前6次議息中或有3次加息半厘。
金龍中國指數反彈4.7%
債息雖然倒掛，經濟仲未衰退，既然未殺埋身，市場且行且看。上周五，美股三大指數反覆微升0.3%至0.4%；值得注意嘅係，反映中概股表現嘅納斯達克金龍中國指數反彈4.7%，據報中國考慮允許美國全面查閱大多數中概股嘅審計底稿。上周六，中證監就針對跨境審計監管發布徵求意見稿，刪除「現場檢查應以我國監管機構為主」嘅表述，並敦促企業減少敏感訊息進入工作底稿。
照咁睇嚟，喺審計監管上，同此前市傳中國罕有讓步以防中美進一步脫鈎嘅消息脗合；不過，筆者仍有疑問。審計工作底稿係核數師喺審核上市公司盤數時，過程中嘅審計工作記錄同獲取嘅資料，睇審計底稿會睇到好多上市公司敏感資料，中國真係肯畀美國睇曬？而美國喺呢方面企得好硬，睇全相冇價講！若果睇曬審計底稿，隨時搵到更多問題抽秤，中槪股除牌風險未除。
港交所能否得益要睇「水」
上周三晚，美國證監會（SEC）再點名5隻中概股納入預計除牌名單，包括已回港第二上市嘅百度（9888），令名單上最快2024年初被DQ嘅中概股增至11家。中概股DQ風波，近因係上年12月SEC通過修訂《外國公司問責法》，遠因則係源於安隆（Enron）假帳醜聞後喺2002年推出嘅《薩班斯法案》，法案要求所有上市公司提供審計底稿。中國係全球唯一司法管轄區，禁止核數師向海外監管機構提供審計底稿。中美已就呢個問題，談判20年無果。
喺中概股DQ風波，港交所（388）成為中概股回流受惠股，誠然，短期係有刺激作用，但長期唔係睇有幾多股份嚟上市，而係睇有幾多資金嚟呢個場！中槪股ADR或ADS退市後，資金未必跟住轉場來港；而且外資正在減倉中資股，即里昂所講嘅「沽售中國」。港交所盈利視乎港股成交，中概股新股、SPAC新股IPO，以及現有大型中概股加快搬貨來港等舉措，若能為魚缸引入水源、帶動港股交投增加，港交所先會得益。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
