操盤手劄記│審計鴿不敵聯儲鷹（割柑人）
操盤手劄記│審計鴿不敵聯儲鷹（割柑人）
美國聯儲局主席鮑威爾喺Jackson Hole全球央行年會發表演說，暗示9月繼續大手加息，則嚇窒市場。
好淡消息對撼！上周五晚，一方面，中美兩國就審計監管達成合作協議，解決審計底稿查閱問題，市場憧憬中概
股由美股除牌風險紓減，可望回復較高估值；另一方面，美國聯儲局主席鮑威爾喺Jackson Hole全球央行年會發表演說，暗示9月繼續大手加息，則嚇窒市場。美股道指瀉1,008點或3.03%、標指瀉141點或3.37%、納指瀉497點或3.94%；金龍中國指數由升4.08%轉跌0.65%。港股夜期由一度高水502點到收市只高水5點；ADR比例指數更轉低水28點。
美股、外匯、加密貨幣免費即時報價，自選投資組合獲取相關新聞提示。
鮑Sir 8分鐘 道指瀉千點
近日儲局官員齊心「放鷹」，似為繼續大手加息造勢；而鮑威爾喺Jackson Hole短短8分鐘嘅演說，更可謂年度最「鷹」表態！佢話即使會為美國家庭同企業帶嚟痛苦，儲局仍會繼續加息遏制通脹，意味但求撳低通脹，不惜犧牲經濟增長。喺佢演說前，利率期貨顯示，9月加息0.5厘機率同加息0.75厘機率相若；但喺佢演說後，加息0.75厘機率升至61%，加息0.5厘機率則降至39%。
美國3月啟動加息周期，已4度加息，合共2.25厘，聯邦基金利率升到2.25至2.5厘；但現時扣除通脹（7月CPI為8.5%）後嘅實際利率，仍處於負值。要遏制通脹，據今年有貨幣政策投票權嘅克利夫蘭聯儲銀行行長梅斯特預計，儲局要加息到4厘以上，兼明年要維持喺呢個水平。美國9月若再大手加息，港美息差擴闊，資金流走，本港銀行到時勢將開始加息，不利後市。
講返中概股審計監管件事，上周四紐約時段，《華爾街日報》率先爆料中美已傾掂數，當日金龍中國指數急升6.26%；翌日香港時段，喺重磅中槪科技股帶動下，恒指、科指高開，分別曾升1.09%、2.09%，分別收升1.01%、0.79%，科指明顯高位急回；到紐約時段，喺中美公布簽署協議下，阿里巴巴（9988）、京東（9618）等中槪股嘅美股，興奮不足半小時又見高位急回，小心相關消息已反映得七七八八，股價短期再升空間有限。
中槪股淡友 或施回馬槍
中槪股嘅審計底稿，將會存放喺內地嘅香港事務所。值得注意嘅係，喺查閱審計底稿嘅程序上，中美表述有所不同。中方表示：「美方須通過中方監管部門獲取審計底稿等文件，在中方參與和協助下，對會計師事務所相關人員開展訪談和問詢。」美方則表示：「有權自行選擇審查的公司、審計業務和潛在違規行為，毋須與中方協商。」美方又補充，若想調查員年底前完成工作，必須讓其9月中前抵達現場。
中槪股高位急回，一來因為鮑威爾「放鷹」，二來審計監管消息大致消化，三來即使審計監管大略拆掂，但細節未拆掂。中方係咪堅持涉及國家安全嘅大數據唔可以向美方交出？如果係咁，已來港上市嘅大型中概股，唔少仍有由美股除牌嘅風險。雖然中槪股審計監管「放鴿」，但對藉好消息挾淡倉不宜寄望過高，睇大型中概股如阿里、京東月頭至月中嘅淡倉變化，分別減少三成、一成，唔少淡友早已趁低平倉食糊，反而要擔心淡友趁高施回馬槍造淡。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
