古星輝 - 開展5.5G綠色合作計劃 | 乜都5G
Hola（你好）！此文章見報時，於西班牙舉行嘅國際科技界盛事世界流動通訊大會（MWC）剛閉幕。筆者很高興周二（2月27日）喺巴塞隆拿，親自見證公司與著名ICT基礎設施和智能終端機供應商，就共同推動綠色流動通訊網絡發展及探討5.5G喺香
港嘅創新應用，簽訂綠色發展合作備忘錄。
分段採用AI節能方案
一般嚟講，5G嘅耗電量比4G高大概7成，有數據預期喺5G元年至2030年的十年期間，耗電量將急升達160%。今年業界將迎來5.5G元年，全球都聚焦碳排放管理，以及加倍關注業務對氣候變化所造成嘅影響。大家各出奇謀，希望能夠透過採用綠色方案，例如儲能、改用潔淨能源等大幅節能減碳，並且喺專注環保之餘，確保用戶嘅優質體驗不變。
今季開始我哋將會分階段喺香港不同區域嘅基站，率先採用先進嘅人工智能（AI）節能方案，全天候管理及分析網絡嘅使用情況。當網絡喺低用量嘅時候，就會自動調節到智慧節能模式，預期喺有關方案全面商用後，公司每年可以減碳超過40萬公斤，相等於由香港直飛巴塞隆拿約1000次、東京約2000次，又或者飛北京超過2600次的碳排放量。早前我哋已經喺新界東試行有關節能方案，預期今季會喺其他地區嘅基站全面應用。
另外喺繁忙地區，我哋亦試用咗環保智能天線以減低用電量。呢種高效能嘅天線，以「0 Bit 0 Watt」為節能目標，即係喺零數據傳輸嘅時候做到零耗電，從而將能源使用量減到最低。例如某地區喺淩晨冇咩人用網絡嘅時候，天線就會進入「深層睡眠」狀態，但當系統偵測到有用量，就會立即「叫醒」網絡提供服務，慳電又唔會影響用戶體驗。早前有測試結果顯示，設備喺休眠時候嘅電功率低於10瓦特，用電量仲少過燈膽。呢個方案更喺MWC嘅全球流動通訊大獎中，攞到「最佳流動技術突破獎」。
近年全球各地不時出現極端天氣情況，大家都警覺到保護地球刻不容緩。我哋喺努力提供優質嘅通訊服務外，亦將竭盡所能推動可持續發展，以及關注業務對氣候變化可能帶來嘅影響，以MWC今年嘅主題「Future First」（以未來為先）為目標！
和記電訊香港執行董事及行政總裁
古星輝
乜都5G - 古星輝 舊文
本文作轉載及備份之用 來源 source: http://www.stheadline.com
