關志康 - 給老闆做多少人情？ | 神耆商機
一位家底豐厚的長者最近娶新抱，親家是城中超級富豪。這位新翁分享道：「一晚使咗我差唔多成千萬，『肉赤』之餘，傳媒還報道是由女家『埋單』。」朋友打趣說：「場面咁盛大，人情應該收到手軟吧？隨時賺到錢呢！」新翁隨即擺擺手，帶點無奈笑道：「禮物
就堆疊如山，至今連包裝都未得閒拆開。」
另一位前新翁感同身受：「我屋企有一間房專門放『唔等使』嘅禮物。人情這個題目向來微妙。普通人去飲宴有公價人情，但做人情畀老闆道理就好深奧，畀得少怕失禮；畀得多，自己『肉赤』之餘，喺主人家眼中可能都只係『濕濕碎』。所以，好多人寧願送禮物代替賀金，如：字畫、擺設、名貴杯碟，甚至特別訂製飾物，刻上名字。這樣雖然體面，但日後轉送他人就不方便，主人家想『處理』都難。」
一位大前輩補充：「我最怕唔係收禮，而係別人答謝我時，硬要請我食飯。一來年紀大，飲食要清淡；二來問我鍾意食咩，菜式簡單驚人覺得我睇唔起人，叫得貴又怕人破費，加上我已經進入人生倒數階段，時間稀缺。心領就好，何必又食飯？然而，偏偏別人盛意拳拳，我又卻之不恭！
仲有，我最怕人同我爭埋單，好似打交咁。輪流請都最好免，因為要記住邊個請過，好麻煩。我畀就得啦，食飯最緊要大家開心，無謂費心神。不過，我同證監會或者上市委員會嘅朋友食飯，就一定『AA制』，瓜田李下，無謂為人添麻煩。」
人情世故，貴乎真誠。有些長者可能更享受一盅清茶、一席閒談，勝過山珍海味。人情不是交易，而是一種理解和體貼。知道對方真正需要甚麼，比「做足規矩」更重要。畢竟最難還的，從來不是錢債，而是「心債」。
健康教育基金會主席
關志康
神耆商機 - 關志康 舊文
本文作轉載及備份之用 來源 source: http://www.stheadline.com
