操盤手劄記│非農爆冷 特朗普減息夢可圓？（割柑人）
操盤手劄記│非農爆冷 特朗普減息夢可圓？（割柑人）
TERS · via REUTERS / Reuters
上周五，美國公布嘅7月經濟數據頗差：非農新增職位7.3萬，遠遜預期，5月、6月數據更大幅下修；失業率4.2%，高過前值；ISM製造業指數48，低過預期，兼連續5個月萎縮。總統特朗普又趁機鬧聯儲局主席鮑威爾唔減息，畢竟該局有雙重使命（dual mandate），要兼顧物價同就業。鮑威爾被特朗普不停囉唆，筆者諗起電影《西遊記》孫悟空覺得唐三藏咿咿哦哦好煩嗰句對白：「成日好似有隻烏蠅摟住⋯⋯對唔住，唔係一隻，係一拃烏蠅喺你耳仔邊，一路飛入你嘅腦裏邊，救命啊！」
美股外幣即時報價 多國新聞任睇
質疑造數 怒炒涉事局長
美國勞工統計局將5月、6月非農新增職位大幅下修，分別由14.4萬修正至1.9萬，以及由14.7萬修正至1.4萬，加上7月只得7.3萬，數據公布後幾小時，特朗普怒炒該局局長Erika McEntarfer，指佢係由前總統拜登任命，又指佢操縱就業數據。不過，目前並無證據顯示該局存在數據造假。曾任電視節目《飛黃騰達》（The Apprentice）主持、口頭禪為「You're fired」嘅特朗普，句口頭禪又派上用場！佢下個目標會唔會係鮑威爾？佢上周五喺《Newsmax》採訪時咁講：「鮑威爾好大機會留任至任期屆滿（2026年5月）。」
喺鮑威爾去留未明之際，聯儲局上周五公布，理事Adriana Kugler請辭，8月8日生效。聯儲局理事會由7人組成，包括主席、兩名副主席、4名理事，由總統提名並經參議院批准。現時7人理事會中，3人由特朗普委任，包括鮑威爾、Michelle Bowman、Christopher Waller，後兩者喺上周嘅議息會議投票支持減息；另外4人由拜登委任，包括Philip Jefferson、Lisa Cook、Michael Barr，以及請辭嘅Adriana Kugler。計及鮑威爾行將卸任，理事會有兩個空缺，將由特朗普任命。睇牌面，特朗普勢力佔4人，屬多數，但唔代表貨幣政策從此會聽佢話，皆因議息投票共12票，除咗7名理事，仲有紐約聯儲銀行行長同4名地區聯儲銀行行長。
聯儲局上周嘅議息會議，一如市場預期連續第五次維持利率不變，唯一嘅看點係今趟並非一面倒支持凍息，而係有多達兩票取向有別於議息結果，係1993年以嚟首次，反映內部對關稅政策影響睇法出現分歧。鮑威爾喺記者會被問到9月會否減息，佢話未定。不過，隨著就業數據出爐，反映勞動市場放緩速度快過預期，鮑威爾連續5次「打臉」特朗普後，輪到自己被數據「打臉」。數據失色，上周五美股急跌，道指、標指、納指分別跌1.2%、1.6%、2.2%；美滙指數跌1.3%至98.69；美債10年期孳息跌14個基點至4.22厘。市場押注9月減息，利率期貨顯示，預期減息比率由38.4%升至77.7%。
減息升溫 公用股受青睞
減息預期升溫，具有穩定現金流同較高股息率嘅公用股受青睞。滙豐環球研究早前發表報告，指喺基本因素改善下，本港公用股嘅股息同美國10年期債息差距收窄至2020年以嚟最少，並有望再收窄，因內地投資者繼續增持，北水持股比例已由上年6月嘅0.5%至2.2%，升至今年6月嘅1.5%至7.5%。當中，該行最睇好中電（0002.HK），因其受惠於拆息下跌同港元貶值。星展亦發表報告睇好中電，指其業務嘅穩定現金流確保股息可持續。中電今日公布中期業績，不妨留意。
割柑人
www.fb.com/hkstockpicker
本欄隔周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
