大師冇點你│港股重上3萬點不是夢（李聲揚）
大師冇點你│港股重上3萬點不是夢（李聲揚）
早排在節目，講起「港股有機會上返3萬點」。當然了，所有預言，都要有個限期
，否則好似「世界末日」咁，講極未到。本人話，應該係12個月內。實情本人大約6月尾開始講，所以就預下年七一之前見3萬吧。
美股外幣即時報價 多國新聞任睇
見唔到咁點？冇乜點，難道賠畀你？話得「有機會」見，即係「有機會」去唔到啦，邊有包生仔。不過本人唔係語不驚人誓不休，我係真心相信嘅。記得早幾篇寫過，「倉位就係一切」。我坐住幾百萬港股，夠信心未？
當然，仲有啲傻仔要講，「香港經濟咁差，股市點會好」。呢個真係近幾年最大嘅謬誤。但介紹返，舊年年頭港股15000點以下，而家25000點之上，已經升咗成10000點，近七成。你鍾意話經濟好差，隨你，但肯定係經濟差股市都可以狂升。正如舊年15000點時，我在Patreon寫「有機會上返2萬」，都大把人笑，話「經濟差股市點會好」。結果呢？舊年何止2萬點，2萬3都見呀。
3萬呢個數，唔知大家覺得太進取定太保守。心水清嘅，計下數，其實而家都25000，上到3萬都只係升多20%。但當然另一方面，今年年頭港股先2萬點，如果今年要見3萬，即係一年升1萬點，升足50% — 冇話唔得，亦唔係未試過，但難些少囉。所以我都係估下年年中先見。
坊間天花龍鳳，乜嘢世界大陰謀都有，跌市又話金融遺址，升市又話阿爺托住。實情唔使講咁多嘢，股票嘅嘢，兩個字：盈利。信不信由你。美股點解長升長有？皆因盈利一路增長。你睇美股最大嘅公司，差不多就係最賺錢嘅公司。你總唔會見到有啲長期蝕錢嘅垃圾公司，上到幾萬億市值。同樣地，你總唔會見到有啲狂賺大錢嘅公司，但市值得幾億。
港股之前積弱，試過連跌四年，問題亦因為盈利。不過「港股盈利」呢味嘢，實情好難計出嚟，特別係而家恒指咁多隻成份股，真係好難自己計。
不過我地可以退而求其次，睇一樣嘢：盈富基金（2800）嘅派息，反正盈富嘅派息，就反映恒指嘅派息。
可以睇到，2018年盈富派息0.95元，去到2019年係0.93元，但在疫情下嘅2020年跌到去0.75元，恒指唔跌就假。之後兩三年，都係一路跌，所以恒指亦都一路跌。
不過跌到去2023年，就好似見底啦。2022年盈富派息0.64元，去到2023年係0.65元，有反彈！有趣嘅係，盈富2024年每股派息，去到0.77元。所以2024年，恒指卒之扭轉四連跌，今年亦都有得升。
2025年情況又如何？盈富已經派咗中期息，0.22元。另外留意，其實你上港交所，係睇得到盈富基金「累積」收咗幾多息，亦即係知道佢會派返幾多出嚟，每日都有更新。暫時，係累積咗0.47元。換句話講，今年全年派息，至少都有0.22元+0.47元，即係0.69元。至少呀下。
都講返，2021年盈富派息都只係得0.675元，但嗰年恒指都仲見過3萬點。2021年都得，點解今年唔得？
李聲揚
前大行分析員，如今無業遊民，別人恐懼時我貪婪
FB Page︰meatbonetea金融肉骨茶
大師冇點你 - 李聲揚 舊文
本文作轉載及備份之用 來源 source: http://hk.finance.yahoo.com
