中環在線：保險界玩翻版三虎再鬥？ - 李華華
新一屆立法會選舉提名期噚日開始，保險界冇乜聲氣，啱啱落莊嘅保險界議員陳健波(波哥)好似會自動當選咁款，但原來有暗湧，上屆同佢爭過嘅中銀人壽一哥蔡中虎(CF)同香港汽車保險局總經理秦鈺池正考慮出選，今屆競爭隨時係08年翻版。
CF同秦鈺池如果真係參選，先要盤算點樣保住上次票數，同時挖走對手啲票，咁先有機會贏。秦鈺池承認有朋友叫佢再出嚟選，佢仲考慮緊係咪再次面對選民。
CF嘅情況就好難估，佢家身在加拿大遊山玩水，看似無心戀戰，但佢下周中就返嚟，立法會提名期截至今個月底，究竟佢係咪攞曬提名，叉足電返嚟就交表開始選舉工程呢？
仲有兩個心思思
之前有消息話金融界由中銀香港信託董事長吳亮星接替李國寶，中央唔想咁多中銀人坐喺立法會，勸退CF，CF否認之餘，又話好多朋友叫佢出嚟選，睇嚟CF選唔選真係要等多幾日先知。
睇番08年選情，都咪話唔激烈。CF、波哥、秦鈺池分別有33、21同17個提名，波哥以60票當選，多CF 8票咋。查實三位早喺06年特首選委選舉對壘，當時票數更加叮噹馬頭，CF、波哥同秦鈺池分別有77、78同71票，三人果真旗鼓相當。聽講除咗呢三位，保險界仲有兩位仁兄心思思想出嚟選㗎。
李華華
mailto:LiWaWa@AppleDaily.com
上一則: 市況低迷財金書失寵齋睇唔買
下一則: 中環在線：李國寶27年來叻過一次 - 李華華
中環在線 - 李華華 舊文
