金手指：我錯，李顯揚冇呃人 - 孫柏文
李顯揚任主席的星獅集團，並無調高私有化星獅地產作價，但星獅地產NAV則大幅提高。
今日未入正題前，孫柏文想多謝各位《金手指》嘅fan屎呢排send電郵問候我。你哋好多都有聽我同火燎森主持嘅商台節目，所以發現我呢排做唔到。因為兩個禮拜日前，我嚴重地PK咗。PK時咬到自己舌頭，好彩下顎棚牙戴咗mouth guard，如果唔係分分鐘咬斷都似。家我食唔到硬嘢，講嘢時亦嚴重黐脷根。
旗下星獅提私有
點都好，條脷家裂開兩邊，要等到兩邊嘅死肉自然甩掉後，先可以再做手術將兩邊縫埋。醫生話希望可以喺8月中做手術縫埋兩邊，埋口後8月尾拆線。希望可以完全康復，講嘢唔好永久地唔清楚(ok，我講嘢一向都係唔清楚，I mean發音唔係好清晰)。
就係因為以上嘅情況，我暫時做唔到節目。再次多謝大家好多好多留言、電郵嘅關心。
入正題，早排我一連幾篇文都講新加坡國父李光耀個細仔，李顯揚做主席嘅星獅集團，想私有化喺香港上市嘅子公司星獅地產(535)嘅建議。
個建議就係，當初公司計出資產淨值為三毫幾，跟住打個八五折做私有化嘅價。咁我之前都講過，最好嘅方法，就係將旗下物業及地皮，以公開拍賣形式賣出，之後就將現金按股份比例還番畀股東，不過你話八五折就八五折。因為始終都要睇究竟啲小股東覺得八五折夠唔夠，呢個係佢哋決定。
咁呢啲常見嘅交易，一路都引唔起我興趣，因為從寫作角度冇乜特別，從炒賣角度，佢一宣佈私有化作價，第一口成交價已非常貼價，冇肉食。
點知，睇睇吓個建議，我發覺佢哋好似計漏咗一塊深圳地皮嘅現價值，粗略用現價嘅話，都應該將星獅地產嘅資產淨值推高三成。我就好傻好天真咁諗：「可能佢哋因內部嘅會計制度，睇漏眼啫。提提佢哋就唔會睇漏啦！」
點知篇文出街之日，有個我識咗好耐嘅社運份子朋友，send電郵來話佢玩得股市，明白喺呢度係你情我願嘅地方。佢出價如果係資產淨值折讓太大的話，頂多一拍兩散。不過，佢最頂氣，就係公司居然連計資產淨值，都可以計漏，咁當時未出正式嘅私有化建議文件prospectus，佢直言話，如果喺份正式文件都係嗰個資產淨值，就會call曬所有國際金融傳媒，之後上街燒新加坡國旗。之後，我都有加問，究竟咁嘅計法，「星獅是無能還是奸？」
已提高NAV逾五成
點知，早排星獅地產真係宣佈大幅提高資產淨值NAV超過五成。雖然冇加私有化作價(即變相令NAV折扣加大)，股價由原本好貼私有化作價變成有成幾折扣(即市場覺得私有化機會細咗唔少)，不過，星獅地產大幅提高資產淨值，對我嘅感覺，我位社運朋友嘅說話最能總結：「Well, Lee Hsien Yang is not a crook, he is just greedy. But greed for a lack of a better word, is good。」
最後，倫敦啲大銀行，個個都好似做咗同業拆息嫌疑犯。見源頭Barclays股價係咁跌，大家都係沽緊啲滙控(005)安全啲，恐第一站有又落番60元。下禮拜二再講LIBOR呢單嘢。
孫柏文
獨立股評人
本欄逢周二、四刊出
上一則: 好不主席：使畀人睇 - 盧先亞
下一則: 曾淵滄專欄：日升日跌玩死股民 - 曾淵滄
~TITLE_S~金手指 - 孫柏文 2012年7月19日 舊文
