金融High Tea——逐行逐行洗倉
2012年7月19日
港股前日彈333點，一副樂觀氣象，但昨日就變晒臉，一度急挫321點，最終跌215點收場，期指更跌279點，嘔番前日升幅三分二出來，前日殺完淡友，昨日再殺好友。
如果對大市升跌要搵個解釋，好多人搵美國有無QE3(第三輪量化寬鬆)來做理由，前日升話憧憬QE3，昨日跌話聯儲局主席講話無暗示QE3，表面好似解得通，但睇深一層，香港升跌都比區內股市多，點解香港投資者對QE3憧憬得特別犀利？昨日下午大跌之初，亦有人話係大陸跌所以香港亦跌，下午一點九時內地股市最多跌1％，香港期指勁跌2％，不過最後內地跌完反彈倒升，最後升0.4％收市，香港期指反彈少少都仲要跌1.4％收場，內地市好香港市差，點可以話內地累香港？
水泥股谷底再跳崖
我就話港股係弱底，成交唔多，舞高弄低更易，你話佢好衰走去沽，佢挾高300、400點殺咗你，到你覺得佢好番去買，佢又插俾你睇。對散戶來講，飄來飄去更難炒。
唔睇指數睇個股，會發現逐行逐行畀人反覆洗倉，昨日又到內房股和水泥建材股插，華潤置地(1109)跌5.9%，是跌幅最大恒指成份股，最大隻的中國海外(688)跌4％，其餘跌得勁啲有遠洋地產(3377)跌約6%。唔知係畀內房股下跌帶動，多隻水泥股急挫，山水水泥(691)跌7.5%，華潤水泥(1313)都跌逾5%。
我都唔係幾鍾意逐隻股價講，好似數白欖咁，但呢啲股份隻隻市值200、300億以上，就咁唔見半成，真係幾得人驚。你話跌乜？可能內房升得多啩(不過水泥股就插到谷底竟然仲有崖可跳)，或者上月內地有25個城市樓價上升，怕激嬲中央，你睇昨日《人民日報》有篇評論文章，大力反駁有學者指「放鬆調控有信心，地產才是大救星」的言論，《人民日報》話「靠房地產救經濟是飲鴆止渴」，叫大家唔好胡思亂想。
內房股升得多跌吓好正常，水泥股真洗倉洗到乾，近日好多個板塊好似逐行逐行畀人洗倉咁，輪住嚟跌，而且一插就係一二十個巴仙，唔見指數郁，但個股就勁跌，例如一直話內地內需仲可以，但你睇內需股，都開始跳崖，例如華潤創業(291)呢幾日開始愈跌愈多，昨日跌2.7％收20.1元，和3月高位30.8元比唔見咗34％。你話華潤便宜，佢跌咗咁多仍有17倍市盈率，而家都唔敢話乜嘢股唔應該跌。
燒燒吓燒到消費股
更強的股份是旺旺(151)，昨日都跌4％，跌到9.2元，佢本來走勢極強，3月公佈去年業績，純利4.2億美元，升17％，公佈業績後股價強勢，一直走在一個上升通道中，但近期一回，也回到上升通道的底部，只怕再跌就穿位向下。
你問我點睇旺旺，我就真係唔識睇，股價回了一點，仍然有37.2倍市盈率，你話今年可否維持去年的盈利增長，真係唔知，只知到股價唔平，我只怕大市咁一直陰跌，弱勢行業插到阿媽都唔認得，會唔會下一步強勢行業都插吓？
去年旺旺大部份原料成本都大升，如白糖、奶粉、澱粉及包裝價格高漲，人力成本又增，令毛利率由2010年的37.6%，下降到去年的34.8%。今年人工成本仍升，原料成本雖回，但銷售增長又能否保持呢？
我覺得市唔好搵股票來沽，已經無乜行業可以話安全，股民要自求多福，短炒一定要止蝕，長揸唔好買貴股。
陸羽仁
上一頁 下一頁
金融High Tea 舊文
