金融High Tea——地產股跑出
2012年7月12日
■港鐵大圍站項目「流標」，有人視為利好地產股。
外圍股市腳軟軟，不過，溫總理話「穩增長」，內地基建股板塊借勢發力，推動大市反覆向上。上證綜指升11點至2176點，結束連續四日跌勢，不過深滬兩市成交只有1067億元。港股在A股推動下，神奇地起死回生，收市倒升24點至19420點，恒指20天線失而復得。大市全日成交回升至435億元。
昨日拖住大市後腿的係內地金融股。當中表現最差的是建行(939)，跌3%至4.93元，係九個月以來首次失守5元大關，成交金額大增至19.18億元。傳媒報道建行有一個大債仔破產，涉款30億人仔，消息嚇壞一眾股民。
內銀氣氛續差
壞帳30億元，佔建行超過6萬億元貸款，對建行不會做成好大的實質影響。有分析指市場擔心建行事件只屬冰山一角，不排除債仔爆煲消息陸續有來。加上早前受減息影響，內銀息差收窄，估計下半年內地再減息，對內銀股更不利。
恒指由今年3月開始一路向下，5月份更係又快又急，跌到大家心都實。大市成交近幾日都在400億元邊緣徘徊。
投資者無晒心機，唔敢入市，大市呆呆吓。摩根大通投資銀行亞洲區副主席兼中國區CEO方方又唔係悲觀。他認為恒指動盪唔等如本地經濟本身出問題，港股唔好，主要兩個原因。一係受歐洲危債惡化拖累，國際投資者㩒實錢包，唔敢投資，其次係對中國經濟放緩、經濟增長下降的擔心。他認為，只要銀根放鬆，股市一定會有表現。
方方睇好下半年大市表現，認為阿爺一定會減息，一方面係全球主要經濟體都在陸續搞量寬和減息，如果中國不跟進，對中國的經濟活動有傷害，而且會增加人民幣匯率升值的壓力。今年一、二季的通脹水準比較低，但阿爺定下的全年通脹指標仍保持在4%至5%，說明阿爺已為下半年的通脹留有餘地，讓期內有多些空間推出更多寬鬆政策。
港鐵大圍站項目「流標」，有人視為利好地產股，因為供應短期又少了，跟住政府立即安排荃灣項目替代，但地產股股價已經紛紛炒上。早排陸羽仁話地產股可以短炒一陣，幾位大藍籌恒基、信和都升得唔錯。不過，最奇怪係近日出現異象的新地。
新地股價近日呈強勢，有人解釋係因為大型項目流標，反映增加土地唔係咁易，對大集團有利。昨日新地仲加多個好消息，就係以69億元奪得北角地王。新地一向擅長發展豪宅，市區臨海大型地皮，雖然話有發展限制，但仍有好大增值空間，若然係早14日擰出嚟招標，肯定打崩頭，無咁平可以買到。
新地猛升有異象
不過，中環茶友話，大型項目流標利好龍頭地產商，呢個因素同一條件公司都會得益，但新地股價係今個星期明顯跑贏，如果留意到新地案，今個星期五有關人等又會報到，又會唔會有關呢？
新地股價由高位撻落嚟，主要打擊係家族爭產演變成廉政風暴，令人對公司管治產生疑慮，由於調查進行了一段時間，今個星期五會否有檢控行動備受關注，對於新地股價係敏感星期五前發力上升，茶友提供兩個解釋，一是主要股東家族成員，可能周五仲係無事，股價於是提早慶賀；另一個係股價可能趁早升定先，咁就算有壞消息，跌起上嚟都無咁傷。
兩個推論都係斷估，茶友話，投資最好盡量避免風險，若然係看好地產股，其他大藍籌就睇少瓣，新地無錯係優質夾抵食，但升咗咁多高追，短線就要自己計數嘞！
陸羽仁
上一頁 下一頁
金融High Tea 舊文
