金融High Tea——地產股趁平炒一轉
2012年7月6日
■地產股上升有基本因素支持，第一係股價平，第二係佢哋賣樓積極咗，價錢平加業績會好，可以趁機炒一轉。資料圖片
內地A股昨日軟弱無力，上證綜指開市無幾耐已經失守2200點，之後在底部橫行，收市勉強上番2200點，收2201點，跌1.2%，港股上午最多跌106點，下午近兩點後突然爆上，彈咗近200點，收市升99點至19809點，美中不足是大市成交只有403億元。
個市特別的地方是脫離內地走勢，內地跌，香港仲要單日轉向向上升，正如我早一日講，港元咁強，多數顯示有外資流入。市場可能預先炒歐洲央行和英倫銀行可能減息或增加放水救市。
體育用品股鹹魚翻生
昨日有意外驚喜的板塊，係近期跌到四腳朝天的內地體育用品股。李寧(2331)昨日宣佈高層大變動，引入外援TPG加強集團管理及執行能力，利好消息刺激股價急飆7%至5.03元，帶挈一眾同業反彈。中國動向(3818)升5.7%至0.74元；361度(1361)漲4.4%至1.88元。我就覺得體育用品股跌到殘，如今市況偏好，資金借機炒吓落後股。
若論市強搵啲嘢炒，可以留意吓本地地產股，好多都跑贏大市，長實(001)升到99.7元，向100元大關進發；新地(016)升1.5%，恒基(012)升2.6%；信置(083)升0.8%，唔好以為信置升得少，佢前升咗3.3%，昨日先至無升咁多咋。
我同中環茶友傾起，近期地產股有啲異動，走勢比較強，除了新地因為廉署案和家族內訌炒唔起之外，長實、新世界、恒基都係在最近幾日內升穿下降軌的頂部，顯露突破向上的走勢，信置升到下降軌頂，作勢欲穿。睇長線投資講價值，但炒短線都可以參考吓張圖表。升穿下降軌頂部，可以再向上走一段。
中環茶友話，新特首CY在3月尾當選，人人都話樓市無運行，地產股在4月下旬跟大市反彈都無厘力水。近排CY畀僭建問題燒到卜卜脆，地產股炒友唔知係唔係個膽都壯番，估計咁環境10月《施政報告》時出招打樓市都唔慌大力，夠膽出來炒吓地產股。
恒基新世界冷敲之選
我就話地產股升都有啲基本因素支持，第一係股價平，第二係佢哋賣樓積極咗，價錢平加業績會好，可以趁平炒一轉。新地有官司，大路可買長實、信置，冷敲可以買新世界、恒基，長實市帳率0.74倍(即股價較資產值有26%折讓)、信置0.91倍，反觀新世界只得0.41倍，恒基只係0.58倍，折讓較深，即係話論平係新世界和恒基平，炒冷門可以炒佢哋。
恒基自兩年前鬧出天匯事件，賣樓窒咗步，新世界過去一直畀人保守的印象，但自從第二、三代上場後，由孫仔負責新盤，樓宇包裝及推廣的手法都進取咗，上半年推盤亦多咗。
至於恒基，主席四叔早前話買股好過買樓，顯然係講緊自己隻恒基價殘抵買。恒基下半年多番啲樓賣，佢在新界有大盤會推出，市區有幾個舊樓重建盤不受政府限制，可隨意推售，預計都會在下半年推出。由而家到10月CY出《施政報告》前，有一段空窗期，恒基等大力售樓，今年業績會較有睇頭。萬一遇上美國聯儲局在8月推QE3，會推動更多用家入市買樓，對發展商更有利。大家記住，我唔係講同地產股做人世，只係講要炒可以炒佢哋一轉而已。
陸羽仁
上一頁 下一頁
金融High Tea 舊文
