金手指：點解渣打未跌完 - 孫柏文
如果你係渣打(2888)股東，都已變成估冬——估緊隻嘢會唔會有乜冬瓜豆腐。前日禮拜二朝早，孫柏文睇新聞睇到渣打幫伊朗Handle2500億美元嘅交易時，個心已經跳一跳。不過特別係有一段令我開市睇股價見到渣打跌7%時，即刻喺facebook嗌話一定唔止跌咁少，等英國一開市，就會再插。
鬧美帝實死無生
邊段報道令我覺得呢？就係話喺2006年時，渣打紐約美洲部阿頭Send電郵去倫敦集團總部，叫總部有關人士應即時檢討同伊朗嘅生意。點知集團行政Director覆：「You f***ing Americans. Who are you to tell us, the rest of the world, that we are not going to deal with Iranians.」呢個高層，應該就係負責伊朗業務嗰位。所以我成日話，地球最危險嘅地方，就係企喺Banker同佢花紅之間。不過我睇到就嘩！心諗，咁樣鬧美帝？你仲唔死？
之後，英國一開市，真係最多跌20%，今次罕有地冇做燈神。其實我哋低估呢單新聞，可能因為伊朗對我哋冇乜嘢。伊朗對香港人，咪就係一個賣石油畀我國嘅國家囉。不過對於英國人同英國傳媒，就係一個會話希特拉冇殺過猶太人嘅政權。對花旗國人來講，就係一個會諗方法炸爆佢哋嘅國家。
試諗吓，如果有一個國家政權，話南京大屠殺係一場中國人為搏同情嘅大話，又因多次話要將北京、上海、香港(係，唔好諗住學電視廣告話齋我哋唔使當軍，我哋就唔使為國捐軀)等移為平地，所以我國已實施高度經濟封鎖。突然中銀監話有間香港上市嘅銀行，被指高層串謀、有系統咁隱瞞，幫呢個政權多年來處理2500億美元交易，仲要當香港分行去信集團總部叫停時，被贈一句F***ing Chinese，你話會唔會只係跌7%？
洗黑錢全部錯曬
不過講真，呢幾年我都耐不耐諗究竟邊個為伊朗提供銀行服務，因為佢哋每日賣幾百萬桶石油，每桶賣成百美元。咁佢哋嘅主要客戶係中國同印度，直線推斷當然就係中國同印度嘅銀行囉。哈！原來，係喺中國同印度起家嘅渣打銀行。我成日笑渣打，係全球對新財技最唔貼市嘅銀行，非常老土。所以先可以諗住搞個賬簿外Off Balance Sheet賺次按息差嘅基金時，次按已經爆令佢哋逃過一劫。點知，佢哋嘅老土程度，就係做番啲大英帝國嘅本業。
再講，原來聯儲局伯南克同美財長蓋特納，已經同渣打講緊數，想輕輕擺平，又係銀行唔使認罪兼玩曬。點知今次，俾呢個剛成立冇耐嘅新監管機構紐約州金融服務部爆大鑊，仲要有咁Juicy得咁Juicy咁爆，我只可以話，兩年前巴克萊幫伊朗客戶收埋5億美元資產被罰2.5億美元，渣打今次係2500億美元，哎。唔怪得噚日街傳渣打問同業借錢利息飆上，太似08年嘅雷曼。
最後，我一定要投訴各大報嘅編輯，起題講呢單嘢時「黑錢」前、「黑錢」後。伊朗嘅大客係我哋中國。貨，就係美國都用兼用最多嘅石油；錢，就係講緊我哋啲人民幣。我哋啲人民幣係黑錢咩？中曬美帝毒，信唔信梁特首捉曬你哋去國民教育！
孫柏文
獨立股評人
本欄逢周二、四刊出
上一則: 以理服人：私募基金有原罪？ - 倪以理
下一則: 曾淵滄專欄：殺淡倉活動未結束 - 曾淵滄
~TITLE_S~金手指 - 孫柏文 2012年8月9日 舊文
