金融High Tea——咪望放寬自由行
2012年9月4日
■內地地主股龍頭中國海外昨升3.7％。圖為主席孔慶平。
■包浩斯主席黃銳林
港股昨日走勢有點蠱惑，外圍美股杜指上日升咗近100點，但期指一開市就插，壓住港股低開，打到好友全線投降之後，個市先至反彈，恒指升76點收場，升0.4％，成交只得390億。現貨收咗期指再回多啲，比高位回番110點以上。
今個月歐洲央行和聯儲局接近開會，隨時出招，又隨時可能未出招住，在佢地開估之前，我估好友淡友都唔敢去到盡，個市跌近19000點邊有支持，會前不會跌得太深，反過來若升得太多，又要小心搶先炒上散貨。
正如我所講，而家都係兩地的地產股最好炒，香港梁特首打壓樓市招數暫時無乜力，雖然不排除佢不斷出招，但本地地產股有理無理炒咗反彈先，長實(001)彈1.3％、信置(083)彈2.4％、恒基(012)彈2.9％，炒地產股安全過炒樓，起碼有乜風吹草動易啲走，有人笑言，特區政府剛剛出招，而家照計係安全期，因為招數有無效點都要實施後觀察一段時間，無理由咁快又出招，炒樓淨係搞手續都要一、兩個月，安全期炒股快手好多嘞。
國企內房講起即彈
內地地主股亦得，龍頭中國海外(688)升3.7％，昨日一開市夠膽低撈已食住4巴仙在手。同屬國貨的華潤置地(1109)升得仲勁，升4.8％，但民企股恒大(3333)就如死貓一樣，只升0.7％，未上得番3元樓上。而家啲錢係咁，又要炒，又要驚，只敢炒安全國企股。
昨日食飯撞到個高官，傾咗幾句，我話阿爺宣佈內地非本地戶籍居民「一簽多行」，政策一出自由行股炒上，但市民反應好大，而且梁特首話暫緩三個星期，到底個政策搞唔搞到落去？
高官面有難色，話呢個政策係前朝曾特首向阿爺提出，內地當時無乜反應，但最近搞開全國非戶籍居民可以在住地申請出國旅遊，唔使番原戶籍所在地申請，本來政策主要唔係針對香港，但有關當局記得香港曾特首當年提過，就順便搞埋益吓香港，俾埋非戶籍居民來港「一簽多行」，諗住益吓香港，但勢估唔到香港反應咁差。聽佢口氣，呢個既然唔係阿爺好想推，只係過去香港要求過，若然而家唔想要，阿爺真係做順水人情隨時收番都得。
放自由行隨時打柴
我心諗若果政策打柴，當日聞政策炒起的自由行股，好似做服裝的包浩斯(483)，做化妝品的莎莎(178)和卓悅(653)等，雖然已從高位有點回吐，但到壞消息成為事實時，仲有得跌吓喎。
雖然話今年內地放深圳等地非戶籍居民到港旅遊，呢啲唔係高檔客，都係豬頭骨而唔係豬肉，但係今次食出一舖詐胡，往後要再放自由行的難度亦上升，因為即使放其他城市所謂高檔客來港，本地也有意見，所以唔好假設自由行客會愈放愈多，一年2000幾萬個大陸客已是極限，至少見咗個短期頂。
若然係咁，我就更加睇淡香港零售業，本來佢地已面對舖租貴、人工貴的困局，生意方面好多行業的增長都係靠內地客，若然話唔好再假設內地客會年年急升，甚至無得升的話，和遊客生意有關的零售業，盈利全線面臨下跌的前景，若然市盈率稍高者，真係走得快好世界，你唔沽佢就老襯啦。好似莎莎咁，近期升了不少，佢中期盈利仍增長27％，所以歷史市盈率有近21倍，問題係佢呢架高速車，係唔係長期可以保持呢種速度呢？
陸羽仁
上一頁 下一頁
金融High Tea 舊文
