金融High Tea——迷失十年雜感
2012年10月15日
最近睇到黑石的CEO費克(Larry Fink)講到，美股有迷失的十年，即係指標普指數在2000年9月29日時有1436點，到今天只有1428點，等如10年白過。有人好有心機咁計過，若在2000年9月用10萬美元買標普500指數基金，若把利息再投資，到今天回報有25%，若買債券基金有100%回報，但若買新興市場股票卻有高達233%回報，所以買美股唔係咁正。
唉，你話美股迷失，港股咪仲迷失，點解？因為美股在2000年、2007年和如今，係三個高位，好似三個一樣咁高的山頭咁，雖然話如今比2000年唔好得幾多，但如今都升到差不多在歷史上接近最高的位置。
睇番港股在2000年9月只有15648點，而家有21136點，唔收息再投資都升咗35%，好似幾正，好似好過美股好多，但唔好忘記港股在2007年升得高好多，最高見過31352點，好係一個高峰咁，2000年和而家的指數都遠比2007年的高位低，唔似美股差不多要創新高，所以港股差過美股好多。
借錢買股 正在高峰
港股低迷，憑感覺可知。此話何解，睇吓人們對借稅貸的反應就知。今年銀行爭稅貸市場，不少銀行打電話叫人借稅貸，大新銀行稅貸低至年息2厘幾，我都收到唔少銀行叫我借錢的電話，雖然我好少借錢，但都會問吓自己感覺如何？如果第一個反應係好想借，覺得借錢買股好易賺錢，結果通常係相反，股市已相當熱，你借咗錢去買股諗住食吓息差賺吓價，結果多數會中招。相反如果情緒好低落，唔想借錢買股，覺得買咗都唔會贏，通常係股市低迷期，買咗反而有機會。
講起借錢買股，又記得2007年股市好癲時，真係聽到人叫你借錢買股，你會有實賺的感覺。當時有人在網上教人借到盡去買窩輪，話炒港交所(388)窩輪，好過返工。我聽到後個心好唔舒服，結果就在2007年10月寫咗篇文，題為「無聲的金絲雀」，文章只是拾人牙慧，引述大摩亞洲區主席羅奇的演講，他的講題是「次按危機：煤礦裏的金絲雀？」煤礦坑內有致命的一氧化碳，呢種毒氣無色無味，礦工吸入過多就會死亡，後來礦工發現，金絲雀能嗅出一氧化碳的味道，一嗅到一氧化碳後就停口不唱歌，所以礦工把金絲雀帶入煤礦內，它們停口不唱時，就是災難快來時。我仲話有讀者80元買入港交所，見隻股升到260元，仲升緊，問我點算，我叫佢沽，唔沽晒起碼沽番三分之一，分段減持，笑看江湖。如今再看，仍然覺得當日的相反理論好合時，感覺太好就要沽。
今年聽到銀行打電話來叫我借稅貸，我就有那種「情緒低落感」，完全唔想聽。若信相反理論，如今或者係買股的時候，感覺差到咁，恐怕再衰都有譜啦啩？
狂炒孖展 輸到跳樓
大家千萬不要以為我鼓勵大家借稅貸去買股，千祈唔好，永遠唔好借錢投資。昨日睇到段新聞，有個翟老師所教學校被殺校，佢自2006年炒金，初時賺過錢，但到去年已蝕逾百萬元，今年佢再向朋友借錢賭過，在黃金1680美元一盎司時高追，結果市勢逆轉大跌，佢被迫斬倉，欠下近200萬元，最後跳樓自盡危殆。
睇番金價今年5月時最低曾跌落1533美元，唔算大跌，只是比翟老師買入價1680元，跌了8.8%，如果佢頂得住無俾人斬倉，而家金價升番上1753美元，佢已經賺大錢。
問題係佢第一可能係賭緊孖展買金，放低5%按金去炒，跌2、3%補唔到倉要斬倉，其次佢連按金都係借番來，根本無得守，一輸就入肉，再輸就打靶。呢個故事教訓我地，唔好借錢炒作，若然係借錢再炒孖展，博上加博，只是搵命博。
我近排成日話「順勢炒吓波幅」，有網友「依家控股」有此提問︰「近排老師比較強調炒股要炒波幅，食一個浪幾個月好走，在下諗咗幾日，咁炒法根據過去四年嘅走勢的確得，但咁樣炒會唔會走失咗下一個牛三呢？假如18000點買咗平貨，升到22000，唔沽，歐美又爆鑊，冇錯係得個桔，但如果入貨價夠平，其實都冇咩損失，反而死坐收息，坐坐下唔知邊年坐到一個牛三就搞掂。在下唔知牛三幾時嚟，可能要再等三五年，從時間睇，隔得愈耐，值博率愈高，老師點睇呢？」
牛熊莫辨 順勢而作
老實講，港股距離「牛三」相當遙遠，你話樓市而家係牛市第三期就似，至於股市，係唔係在牛市中都係問題，唔好話牛市第三期啦。近半年港股走勢的確有改善，但若論要確認入番牛市，第一步要升穿今年2月高位21700點，然後再升穿23000點，然後再升穿25000點，一級級咁上，回落時又唔跌穿上次低位，才確認牛市開始。
升勢持續 追落後股
我建議依家控股，可以用精神分裂的方法，一半做長線投資者，唔沽等牛三，一半順勢炒，升到咁上下就走人，食番佢三幾千點波幅。正如我上面講2007年的那個揸住港交所的例子，若80元升到260元一股都無沽過，見到跌番落嚟，真係好揼心。而家一樣，若然手上有貨死等佢牛三，點知佢升幾千點又回落，就認真無癮，所以分一半炒波幅，絕對無壞。你見佢一級級上穿高位，回落時又回得唔多時，確認牛市走勢，再增加番持股量都未遲。
現時若估計大市仲有得升，可能都係要追落後股，整個內銀板塊及巨型內險股都係較落後的股份，內銀股成為上周焦點，中央匯金公司增持消息，推高內銀股股價，我仍然相信內銀仲有得升，不過升得太急可能先調整下才再上。
有人話內銀升完國壽(2628)都可以追，因為國壽受內地投資市場氣氛影響，股價長期落後，我就話如果國壽得，意味着內地A股市場唔差，因為A股唔得國壽難以起飛，咁點解唔直接買安碩A50基金(2823)，博A股見咗底將有較大反彈呢？A50上周收9.85元，52周低位是9.02元，從低位反彈咗唔多，若然十八大愈來愈近，阿爺都要出多啲招維穩股市，利好A股。另外中國公布9月出口增長按年升9.9%，較八月按月比較亦升7.2%，升幅遠較市場普遍預期5%為高，顯示經濟可能短期見咗底，亦利好股市。所以追落後，係唔係追A股基金仲好？
陸羽仁
上一頁 下一頁
金融High Tea 舊文
