炒功(7)
2013/1/29 上午 09:12:58
網誌分類: 經濟
美股連升八日，昨日終於要?W?W氣。不過跌幅不大。杜指高底只52點。杜指收市微跌14點至13882點，標普500收市跌3點，仍企於1500點上方。
美股調整，主要由美國12月二手房簽銷指數下跌4.3%拖累。分析指二手房簽銷之所以減少，除了季節影響外，一般而言，冬季係房地產淡季，另一個主要原因係受低庫存影響。隨住美國房地產回暖，多數地區尤其西部地區，低過10萬美元的住房供應愈來愈少。市場估計—要去到春季，情況會有改善。事實上，12月二手房銷售同比增長6.9%。房地產市場仍在復甦之中。
另一份經濟數據抵消了二手房簽銷指數下跌的負面影響。美國12月耐用品訂單較上月增長4.6%，遠好過市場預期的2%。衡量未來業務支出的指標也上漲，顯示企業對財政政策收緊的擔憂並未如2012年底所擔憂的那樣嚴重影響投資計劃。
聯儲局今個星期召開本年度首次貨幣政策會議，周五則公布非農就業數據。投資者相對變得謹慎。不過，普遍估計係聯儲局唔會大改現行的貨幣政策，美國就業情況亦唔會轉差。
市場現時對後市有些少隱憂，原因美國企業對今年首季盈利預測，普遍都唔係咁睇好。至目前為止，標普500指數企業已有三份一派了成績表。整體的盈利增長6%，營收增長4%，市場此前預期只有2.5%及2%。當中有61%的企業盈利超過預期，令分析員跌曬眼鏡。
實情係，分析員此前覺得財政懸崖將大大打擊美企的營運，對美企業績不寄予厚望。預期較差，超預期就相對比較容易啦。例如昨日公布業績的Caterpillar，唔計一筆過收購開支，上季盈利每股1.91美元，好過市場預期19美仙，但與去年的2.37美元，就大大不如。
Caterpillar預測2013年首季營收140億美元，而市場預期係151億美元。Caterpillar同好多已公布業績的美企都唔睇好未來的營運環境。叫人有點憂心。當然，真實情況是否如此，仍要等大部份企業公布了業績才有分曉。
今日想再講炒功。炒股第一要務係要知自己在炒，唔係投資，唔好問埋那些基本到唔基本的基本因素問題，那些東西可以變成炒作的藉口，不會影響大局，真正影響走勢是短期的供求動力。唔好炒一隻股，到佢轉勢下跌時，仍然盲信人地早前炒股時講的長遠利好因素，揸住唔識止蝕。
炒股第二要務是要有計劃。包括想賺多少，預了蝕多少，看看可不可行。好似網友Bibirain早前話「上星期在15.18買左4500股960龍湖，諗住炒下，到15.6就放，依家跌到14.6,好無耐，做足準備10%止蝕。後悔太心急。」Bibirain的炒法有好大漏洞，諗住食2.7%，止蝕有10%，輸一次要贏四次先至補得番，你條數計唔通，係典型的贏粒糖輸間廠。我估Bibirian可能見龍湖升緊，諗住入場搭順風車，可能想快到早上落盤下午就可以食糊，買貨時根本無諗止蝕(因為有諗的話，無理由咁唔合理)，到買完調頭回落，才諗10%止蝕。假設Bibirain今次捱到唔輸，甚至番上去15.6元食到2.7%，佢下次又會咁炒。問題係方法唔好，長炒必輸，根本唔係吼唔吼得中好股，不是冧巴的問題，而是炒法有問題。你要10%止蝕，至少也要睇10%升幅，這才是1博1。你唔係對沖基金，唔使玩高頻交易，定好計劃，輸的次數少，贏的次數多，長線才會贏。
炒股第三要務是先諗蝕才諗賺。睇中時錢會自動來，唔需要太擔心，睇錯時如何止蝕才是最重要，要定好止蝕，要減少止蝕的機會。好多朋友話炒股若定止蝕，經常要執行。我話這是你的問題，不是止蝕這個方法的問題，你入市位和時機不好，才經常要止蝕。所以我定炒股入市位，先考慮10%的止蝕位，盡量不高追，因為高追一回就要止蝕。等如熱門股回吐到咁上下，計下若到入貨價低10%時，遠在上升軌之下，即係話如果要止蝕，隻股已大幅跌穿上升軌，以減低止蝕的機會。若一隻股近期一直守住上升軌向上升，要突然轉勢穿軌向下的機會低少少，亦減低止蝕的機會。例如你24元買中國海外，10%止蝕係21.6元，佢跌到止蝕位，都要走啦。
你做足上面三件事，小心執行，應該可以輸少贏多啦。
陸羽仁
(我今天外出暫停答問一天)
回應(2) 我想回應
陸羽仁 BLOG 舊文
