金融High Tea——炒作從來無實質
2013年1月24日
中央12個部委日前聯合發佈關於加快推進包括汽車、鋼鐵等九大重點行業的兼併重組指引。A股相關板塊聞風而動，H股炒得比較有聲色嘅係鋼鐵股，馬鋼(323)升3.8%至2.73元，鞍鋼(347)、重鋼(1053)升超過1%，最勁係首長國際(697)大漲9%。
全球及中國近幾年持續低迷，對鋼材需求大幅縮減。中國投資者素來唔做市場分析，旺市時大舉興建鋼廠，鋼鐵廠遍地開花，搞到中國鋼鐵業年年虧損嚴重。內地有好多行業，例如太陽能業、水泥等，面對的情況都係一樣。阿爺見到形勢不妙，所以提出重組合併，希望藉此救救這些企業。
港股高位窒窒吓
港股最近日日爬高少少，但每日都係高開低走，波動不大，悶局一場。恒指微跌23點，收23635點，大市成交則大升至808億元。港股由去年6月低位18249點開始反彈，半年已經急飆5400點，唔少分析對大市前景開始謹慎，大市近幾日亦已開始「窒窒吓」，好多日先高後低，但尾市回穩。呢個現象估計係內地經濟見底，股市轉好推動所致，跌唔落去。
好多投資者窒步，但摩通繼續唱好，話近期走勢將能夠持續，比較睇好內銀、汽車、博彩、非必需消費品及工業板塊。摩通睇好大型銀行，原因是盈利復甦。至於內房股，則較睇好着重發展三線城市的開發商。摩通又上調多隻澳門博彩股目標價，指銀娛(027)為貴賓廳市場復甦的主要受惠者；金沙中國(1928)增長前景清晰，以及可持續派息；澳博(880)潛在派息驚喜，係追落後之選。
上日炒得火熱的前海概念股昨日有少少燶味，因為幾隻股都係大幅抽高單日轉向回落。前海概念去年久不久已有炒作，自去年年中不時有炒味，近日深圳政府擬定前海的《土地出讓暫行辦法》，多隻深圳股乘機炒上，有些更炒到失魂。
前海概念隔日燶
現時炒作焦點係前海的15萬平方米地皮，市場傳招商局國際(144)母公司招商局集團、中集集團(2039)及深圳國際(152)，三間夾埋有前海4萬平方米土地，即係已佔前海27%土地。前日一話開波炒，中集升18.2%，深圳國際升21%，招商局國際亦升8.8%，升幅得人驚，比較離譜的是招商局國際其實無地，地皮係佢阿媽招商局集團擁有，佢都無情情炒高。到昨日早上再炒一轉，幾隻股都高位急回，就好有散貨味。
中集集團(2063)昨日最多升5.3%，最後倒跌2.3%，若在昨日高位14.73元買入，到收市已唔見咗7.4%。深圳國際最後雖然都升1.8%，但佢最多升過10%，若摸正高位買唔見咗7.5%。招商局就跌4.2%。
有評論家話前海?家剛平整土地，仲未開發，呢啲公司即使有地，都未必有實質得益，我就話炒作從來唔講實質，炒開就一窩蜂，跟風炒者十個有九個半唔知升乜就跟咗，好以招商局國際670億市值咁大隻股票，前日都可以咁樣亂咁炒上，所以炒起上來真係傻傻哋。在呢啲傻市，開始唔係幾適合投資，唔係話市面上無一啲有質素又便宜的股份，而係散戶一係唔買，一買一定係買比較熱的股份，若買咗貴股唔識分，若回落又唔識走，好易坐艇。
相反若然愛炒，呢啲市你太冷靜又唔使炒，不過即使頭腦發熱，遇上喪升股，都係做吓一日鮮就夠，過夜都無謂，小心隔日燶。
陸羽仁
上一頁 下一頁
金融High Tea 舊文
