金融High Tea——乏本宜慎行
2013年2月14日
蛇年到了，陸羽仁祝大家金蛇吐信，股市出擊必中。
放假期間，美股再上高位，杜指上日(周二)升47點，上到14018點的五年高位。七大工業國(G7)財長及央行行長上日舉行會議，會後發表聲明，承諾由市場決定匯率，並指出財政及貨幣政策絕不能用於令貨幣貶值。美國的官員在會後透露，包括日本在內的G7聲明是反映對日圓過度波動的憂慮。
日圓轉強不利日股
自去年10月底以來，日圓兌美元由77.57日圓，一路貶值至上日最低的94.43日圓，貶值超過兩成！日股亦鹹魚翻生，日經225指數期間由8650點暴漲至上日最高的11488點，漲幅接近三成三。日圓日股大幅波動，令全球金融界敲起貨幣戰爭警鐘。周二，G7(七大工業國)發聲明話各國央行唔可以利用財政和貨幣政策刻意壓低本國幣值以促進出口。路透社報道有G7官員指該聲明實際上是針對日圓匯率的過度波動而發。
市場擔心日本在其他六大工業國的壓力下，放慢推低日圓匯價的步伐，令日圓兌美元一度高見92.84日圓，昨日下午報93.33日圓。日圓轉強，日股昨日收市跌番百幾點，日經225指數收跌118點至11251點。
不過，日股下跌同香港無關，香港都係跟美股多啲，蛇年開局向好。
放假期間，鄉議局主席劉皇發年初二到沙田車公廟為香港求籤，求得95號下籤，籤文內容是「駟馬高車出遠途，今朝赤腳返回廬；莫非不第人還井，亦似經營乏本歸」，解曰「宜慎小人，凡事不利」。
雖然車公籤文呢啲只係迷信嘢，但係準過里昂的風水指數好多，所以點都要睇吓。好多人從政治角度睇，話籤文唔利梁特首，話佢會赤腳返回廬咁話。我哋講投資，不妨從投資角度去解籤，駟馬高車出門，即係出門時威威水水啦，咁都幾配合香港而家的景象，樓市熾熱，股市翻生，遊客逼爆，一片繁榮。但籤文講的是高開低收格局，因為後段係赤腳返屋企，經營乏本歸，本都輸埋，都有少少淒涼，係唔係預示而升得愈高的東西，而家會跌得愈多呢？
工商物業無管制炒到癲
放假聽聞一個旺角舖位成交，地下個舖只有幾百呎，樓上兩層三、四千呎，即係地下只可以做個門口，通上樓上，你估成交咗幾多錢，6億！做糖水舖，收租1厘幾，真係炒到癲，若平靜的市況，呢啲舖真係1億有交易。
買舖都亦係炒場老手，好明顯想6億入、6億幾7億就走，呢個係扑傻瓜的遊戲，最後一個接咗沽唔出，就會「赤腳返回廬」啦。政府對住宅炒作有打壓，所以無升咁癲，商舖加工商物業，由於無管制，就炒到癲晒。
車公話「宜慎小人」，我話呢個小人係聯儲局主席伯南克，佢只顧本國國民生死，不理他人死活，佢一手導演這個大印銀紙的遊戲，只要因為佢太成功(美國經濟突然好轉)或太失敗(美國未救起經濟通脹已急升)，都會突然逆轉。
到時資金成本一升，就是車公所謂「乏本」之時，環球資產市場那些東西升得多，就會跌番突。資產市場逐步走向高峰，大家要記住乏本年代將會來臨(可能是半年一年之後)，要未雨綢繆，謹言慎行。
恒指上個交易日收報23215點，微漲38點，龍年累計大漲3106點，漲幅超過15%。分析普遍認為由於美國削開支問題未解決，歐洲又因西班牙及意大利政治形勢未明朗，恒指短期仍會整固，估計恒指今季仍有機會跌穿23000點。板塊方面，本地地產股因政府會否繼續出辣招對付樓市仍有待觀察，內銀、內房則受內地政策困擾，投資者宜靜觀其變。有分析指部份大型藍籌，包括食品及日用品股、本地銀行股及科技股，料可跑贏大市。一來係這些股份的業務和經濟周期相關性較低，防守力會較強；二來係食品及日用品股的盈利增長仍在穩步向上。
建銀比較睇好旺旺(151)，指旺旺奶類飲品增長較快，米通業務則會扭轉弱勢，目標價睇12.2元。而彭博綜合券商預測，旺旺今年的盈利增長可達24%。旺旺假期前收11.02元，漲2.6%。
陸羽仁
上一頁 下一頁
金融High Tea 舊文
