金融High Tea——炒炒大數據
2013年5月15日
內地股市回吐1.1%，港股就跌早咗一日，昨日想反彈結果跟埋內地回吐，不過僅微跌59點，跌幅0.3%。成交546億，繼續係比較靜的市況。
內地股市下跌和人民銀行宣佈本月第2次發行270億元人民幣3個月票據有關，在本月9日人行已發行了100億票據，央行連番發短債，被視為收水行為，所以股市下跌，香港掛牌的A股掛鈎工具都下跌，暫時應該都要捱吓價先。
但我覺得真相係內地水太多，有好多錢流入中國，當中部份係炒作人民幣或套息的熱錢，所以阿爺要發債吸水。理念係咁，內地實行外匯管制制度，民間不能自由換匯，有外匯流入，央行就發行人民幣去兌換，呢啲叫「外匯佔款」，換言之外匯流入增加時，央行放出的人民幣也增多，水滿就要發票據去吸。資料顯示，自去年12月以來，中國外匯佔款已連續增長4個月，單計今年第一季央行的新增外匯佔款已高達9433億元，數量驚人。
唔係放水 仲要收水
外匯流入中國表面上係貿易盈餘或外來投資，但中國4月的外貿增長數字好大，被質疑造假，真相是4月份以來，中國出口，尤其是內地對香港出口數字坐火箭地急升，可能是海外熱錢借道香港造出虛假貿易，搬熱錢入內地套利，順便偽造進口資料獲取更多外匯貸款。
結論係美日大印銀紙，資金流入內地，內地並不缺水，短期內不止無法減息，長咁落去隨時要加存款準備金率㖭，真係麻煩，股市睇住政策炒變無得炒。
跌市睇吓乜股好，感覺又唔係咁差，見到有唔少股份炒上，仲創咗1年新高，風電股再受追捧，大唐新能源(1798)表現最佳。日圓匯價下跌，應該仲未見底，炒日圓下跌概念的股票，包括富士高(927)、精電(710)，呢類用日本零件的公司就開心嘞，相反以日本市場為主的公司就有排捱。
同茶友傾開兩隻逆市強勢股，一隻越秀產託(405)，一隻新意網(8008)，兩隻股都係在上星期同朋友食飯時提過。越秀房託我一直睇好，過去經常叫人買，但最近急升上來，有朋友問我好唔好沽，我見人賺得多，通常會話沽啲食吓胡唔緊要，但是長揸貨不要清倉就得，但真係愈沽愈高。房託急升，理由昨天講過，而家無嘢好買，唯有買房託啦。
新意網本來無人注意，昨日再升3.3%。上星期見佢郁郁吓，大家講吓理論，中環茶友話炒資產，因為佢在2000年科網狂潮時上市，泡沫爆破後，轉型買工廈做數據中心，本來無乜概念，但13年過去，依家工廈都炒到顛，萬一佢搵啲偏遠地方將數據中心搬走，將工廈攞番出來發展，條數咁好和味？
炒新意網 一雞兩味
我有另一個理論，外國和中國開始炒所謂「大數據概念」，隨着電腦運算力大增，資料產生成本急速下降，人類產生的資料量正在呈指數級增長，全球數據量兩年就番一番，現在已是大數據的年代，將來會有爆發性的數據生意。阿里巴巴老闆馬雲趕上潮流，在公司設立首席數據官。香港唔係有好多同大數據生意有關的公司，所以炒大數據概念，第一間就想到做數據中心的新意網，佢變成炒地產概念又得，炒數據概念又得的概念股，我認為這個「大數據熱潮」，最後都會在股市中開花。
陸羽仁
上一頁 下一頁
金融High Tea 舊文
