金融High Tea——盲俠跳車王
2013年6月11日
呢兩日係內地端午節小長假，A股今明休市，港股自由行，但冇方向兼缺乏動力。美股杜指上日大升207點，日股因為日圓回落而大升636點，港股就「醫番都嘥藥費」咁款，恒指最高都係升得147點，上升乏力，收市微升40點至21615點收場，大市成交萎縮至497億元。港股人升佢唔升，完全乏力。
昨日科網股炒得好勁。中美市場都係炒科網股，傳聞阿里巴巴集團計劃來港上市，包括騰訊(700)、網龍(777)及金山軟件(3888)首季業績勝預期，整個板塊獲資金追捧，炒味特濃。
網股狂炒 內線減持
連賣電腦的聯想(992)都炒番起升近3%，係表現最好藍籌股。騰訊(700)一度挨近52周高位315元，午後回落，收市仍升1.8%至305.2元。金山軟件傳百度入股後，有大行唱好，指其WPS軟件增長潛力大，股價昨升7.8%至14.1元，創上市新高。提供ISD系統畀監視器及閉路電視產品的中國安芯(1149)及從事電子公共採購平台的中國公共採購(1094)齊齊抽升超過一成！
隻隻都升，歸因一個炒字，但要留意吓內線人士的行動，例如騰訊首席技術官兼執行董事張志東上周四減持25萬股，每股均價300.098元，持股由3.55%減至3.54%。張志東上一次減持在對上一個星期即5月31日，減持25萬股。騰訊雖好，但升到如今35倍市盈率，公司高層手上咁多貨，真係唔沽就笨啦。
陸羽仁剛同一家內地知名體育用品公司高層食飯，講起幾年前在體育用品股炒浪中，佢哋老闆不但無沽股票套現，連捐錢做善事，都只係按股票借錢去捐，有外國大品牌提出以幾百億全購老闆的股份，老闆都唔捨得賣，又或者唔想離小股東而去。後來一個大浪打來，體育股大插水，老闆一度搞到有點狼狽。呢個故事教訓大家，在股海浮沉，當知花無百日紅。
講起插水，昨日見一眾頁岩氣股下插，安東油田服務(3337)午後開市即插，收市大插8.5%，收5.5元，巨濤(3303)插8.5%，收1.94元。其餘好似宏華(196)重挫6.5%。
頁岩爆泡 穿位要走
我早兩個月寫炒頁岩氣股時，曾經和一個有炒作這類股份的中環茶友討論過，再同佢傾吓，自謂「盲俠跳車王」，昨日已將頁岩氣股全數清倉。佢話呢啲潮流炒作股，唔係咁快有業績表現，好似幾年前炒煤股都係咁，市場旺就炒作，等到出業績都跳咗幾次車啦。
茶友話佢揸住把間尺做人，劃一條上升軌，若升得急，高位減持一啲，回吐吓又買番，但回到貼近上升軌邊時就唔會再買，仲金睛火眼咁睇住，一穿位就清倉。宏華上個月已穿上升軌佢無再玩。昨日早上見安東、巨濤開始下插穿位，有少少爆泡味道，未到中午已走清，算做避過下午的大跌。
我問佢咁盲目跳車，萬一呢啲股稍一穿上升軌最後又炒番上去，咁佢咪跳錯車？茶友大笑一聲，話佢呢啲間尺黨當然有可能跳錯車，但佢自認炒呢啲熱股係盲俠行為，唔搵把間尺同止蝕位保護自己，真係同袋住十萬蚊現金行銅鑼灣一樣，要預咗畀人扒清至好。佢補充一句，呢排好多熱炒股一回就大插，大戶計數離場，啲錢仍有流失跡象，唔好太快睇好個市。
陸羽仁
上一頁 下一頁
金融High Tea 舊文
