金融High Tea——阿福的教訓
2013年6月20日
文章見報之時，美國聯儲局議息已有結果，開大開細無謂估。港股昨日相當忐忑，早段跟內地股市跌，恒指最多跌329點，午後隨內地股市反彈，內地上證綜指收市跌0.7%唔算多，港股一度彈近前日收市價，當大家都以為無事之際，點知在3點內地收市後再度下滑，最後跌238點收市，收報20986點，國指跌1.5%，再次明顯跌多過內地股市，顯示老外投資者對內地睇得仲淡。
老外睇淡的原因是阿爺對經濟下滑的容忍度增大，見經濟唔好內地央行並無如預期般在公開市場操作中「補水」。有分析指出中央正有意借財政、貨幣與經濟增長政策，推動經濟轉型。現時，產能過剩仍然係中國最嚴重的經濟問題，全球最大債券基金太平洋投資管理(PIMCO)的亞洲信用研究主管Raja Mukherji指出，「中國在2008年推行的增長刺激方案，對於穩定市場雖然是有必要的，但金額似乎過大、過於關注固定資產、過於着重建築領域，最終使得這些產業面臨嚴重產能過剩的問題。」中國5月生產價格下跌2.9%，意味着中國增長遠低於其實際潛力。
產能過剩已經嚴重威脅到眾多中國產業，包括建材、金屬、化工以及新能源等，你睇吓中國的鋼鐵股跌到咁，就知問題幾大。即使聯儲局議息呢浪過去，中國經濟放慢的一浪仍會衝擊股市一段時間，直至市場見到中國GDP增長下行走勢暫停為止。
隊完收水 再隊中國
珠寶股周大福(1929)公佈截至3月底止全年業績，全年純利按年跌13％，只得55億元；睇上線營業額亦僅按年微升1.5％至574億元，毛利縮到163億元。周大福的古仔好簡單，生意放慢，成本大升，純利就倒退。去年租金開支增加50％至10.2億元，令佢毛利率由對上年度的29.1％跌至28.4％。周大福昨升2.3%收8.86元。
周大福盈利倒退，證券界無個睇好，瑞信將周大福目標價大降24％，由12.1元降至9.2元。摩通亦話，周大福批發業務收入放緩，但業務前景存疑，雖保持其「增持」評級，但將周大福目標價由12元下調至10.5元。摩通話周大福採取70％黃金對沖政策，仍視佢為下半年奢侈品行業中的首選股份。
最好生意只是賣金
話好話好，睇番阿福的股價走勢認真唔好，但同時，該股自2011年底以15元招股，真係未好過，一直跌，到去年7月見低位開始反彈，到今年1月升番到13.4元高峰，來一個雙頂，原來已是最好，跟住一跌破上升軌就再直插，如今得番9蚊都唔夠，若上市揸到而家，蟹足年幾，唔見四成。阿福的教訓一是好多公司都係在業績高峰期時上市，你買佢炒兩日唔走就笨(佢上市時我警告過大家，話零售市道快見頂)。教訓二是持股一跌穿上升軌，要好認真諗沽唔沽，你係股東今年1月見佢跌穿上升軌在12個幾還有跳車機會。
我早排去尖沙咀睇鴨仔，專門去睇吓各大珠寶店的生意情況，見好多都拍烏蠅，只有周大福仲有少少人頭湧吓，入去睇大部份都係內地客買金。賣金飾利錢薄，鑽石珠寶利錢厚，但我見唔到好多揀貴嘢。阿福已經係最好生意，其他珠寶股更加唔好掂。阿福哥股價跌得多或者可以反彈一浸，但都唔好睇得太好啦。
陸羽仁
上一頁 下一頁
金融High Tea 舊文
