金融High Tea——孤兒市衰夠返歸
2013年6月26日
■其中一個入市法係買強股好過買弱股，強股如滙控，息差拉闊有利環球銀行，暫時表現好過大市。
內地個市跌起上嚟唔係人咁品，上證綜指周一大跌5.3%後，昨日最多再插5.8%，上證綜指一度大插至1850點，連去年低位1949點所謂「建國底」話咁快就隊穿(因為中國在1949年建國)，一下子跌到「咸豐年」(清朝咸豐帝在1850年接任)的四年低位。午後金融股神奇V形反彈，帶領大市差不多收復所有失地，上證綜指收市只係微跌0.2%。港股跟到足同樣坐過山車，一度大跌388點至19426點，但收市倒升41點。
香港跌市完全跟內地股市，阿爺應否救市成為內地市場熱話。有內地財經網做了一項調查，結果唔難想像，贊成中央救市超過61%。正如我昨日所講，如今李總理不同過去的溫總理，過往溫市一跌就救，如今李市要市場自行調整，結果《人民日報》撰文表態「證監會不是股市的奶媽，央行也不是。救市和托市，不是幫了股市，而是害了股市……只會加劇資本市場的積貧積弱，絲毫無益於一個完善的、多層次的資本市場建設。」
V形反彈 沽突回頭
阿爺唔做奶媽態度明確，短線而言股市只能做孤兒仔，佢走出街流浪，唔好望奶媽會跟到實照顧周全，要孤兒玩夠衰夠，就自己返屋企。內地股市昨日早段再急插，和《人民日報》的「不做奶媽論」有莫大關係。
內地股市由大跌113點變成只跌3點，表面亦同救市有關，當時市場傳上海陸家嘴論壇監管部門會有穩定市場信心的言論，股市就兇猛反彈，結果無事發生。我話內地市反彈的真正原因，只係因為呢兩日插得太多太急太過份，有大量跟風者追入沽空，一有風吹草動，大市回到夾上，就把大量淡倉夾死，所以只是技術性超跌反彈。
呢兩日好多朋友打俾我，大家都想飛身撲入市，我覺得股民有點過份熱情，冷靜不足。若然只是短炒，任何大跌的一天都可以入市，你用500點博佢500點，好似昨日跌了300幾點時，你入市先定好再輸500點止蝕，博反彈500點走入，咁買入無妨，買咗只要今天再彈100、200點就可以食胡，炒咁短幾時都可以博。
但若然你睇中線，雖然大市跌咁多可能仲有較多反彈，去到20500點至20800點就可能行人止步，那裏就是這條好急的下降軌頂部，彈完仲可能再插，主要因為阿爺擺明不救市，會大大增加市場短線下插風險。從時間上來說，跌市無咁快一浪就跌完，從深度來說，去年微穿18000點的年度低位，支持力才會較大，對上的位置如19000點未持力似乎不夠，大家記着前提係阿爺變咗，佢可能不會在跌市時宣佈不恢復IPO、減印花稅、國家隊入市等救市措施，甚至唔理個市照樣搞官方導演的金融海嘯，逼銀行洗太平地，所以內地股市還有跌多啲嘅空間，也會帶住港股落。
匯控強勢 靜待低吸
我向朋友講另一個入市法，係唔定那一個位入，等見到第一個低位後，再等第二個低位，要第二個低位明顯唔穿第一個低位，開始有一個級級向上的形態，才開始入市，或者會買貴一啲，但安全啲。
另外最好等買強股好過買弱股，強股如匯控(005)，息差拉闊有利環球銀行，暫時表現好過大市，弱股如國壽(2628)，衰過大市好多。
股市通常會咁跌，弱股先急跌，再跌普通股份，最後強股先至會跌得多啲，所以等到匯控等強股都跌多啲時，才是大市見底的時候，匯控昨日收79.699元，個市衰起上來，佢可以跌多10%。有股民因為昨天低位無撈貨好揼心，我就認為機會多的是，10樓跌落嚟會死人，4樓跌來一樣死，過早瞓身，大市還有急插在後頭時，怕你買到爆倉跟住瞓唔着喎。
陸羽仁
上一頁 下一頁
金融High Tea 舊文
