金融High Tea——暴力哥夾起內地市
2013年7月11日
昨日個市又抽，上午抽高升穿21000點大關，高見21044點；午後則插到20633點，高低位相差411點；及後又因內地股市大升2.2%而V形反彈，收市報20904點，升221點，不過成交仲係唔得，咁大上大落都係得530億成交。
最近同啲投資銀行朋友傾起，佢地都話呢幾個星期個市反彈吓，真係如「暴雨中的陽光」，俾佢地有個小小窗口唞吓氣，唔知大家有無留意，有一堆中小型公司唔理大市氣氛，都係呢兩個星期湧晒上市，大有「唔上就笨」的態勢。投行朋友話真正大茶飯係阿里巴巴集團(可能會在港雙幣上市)，依家呢啲只係雞胡，但有雞胡唔食，怕個市再插要食穀種。從新上市公司落雨收柴的心態，就知道無人敢盲目樂觀。
新股只頂一兩日
依家新股上市多數散戶無乜認購，全靠大戶的國際配售頂埋個數，認購倍數係唔係咁有指標性真係見仁見智，認購少未必散，好似澳門搞漁人碼頭的勵駿(1680)，招股時公開發售部份僅獲17%認購，上周五上咗市，昨日都有2.4元，高過招股價2.35元，叫做有交代啦。
認購多亦唔一定得，軟件股擎天(1297)早前公開發售即超額認購6.99倍，是近一個星期罕有高認購股之一，上市價1.45元，前日掛牌，開市仲有1.49元，原來呢個價已是最好的逃生出口，股價只頂咗一日，到昨日大插18.6%，收報1.14元，招股價唔見咗21%。過去呢個星期的新股真係唔跌都還神，金彩(1250)上市兩日，亦比招股價唔見咗11%。再早少少上的昆侖金融(8077)比招股價唔見20.4%。
今日有兩隻新股掛牌，一隻港大零售(1255)，公開發售部份有高達24.4倍超額認購，發售價仲以上限2.13元定價；另一隻內地媒體股智美控股(1661)，公開發售部份只有0.28倍認購，以下限2.11元定價，真係要睇睇認購高係唔係股價得啦。
我同一個股壇大孖沙食飯，佢都識部份新上市股份的老闆，佢話依家呢種市道，上市後頂得住招股價的新股，都有好硬後台，或者有朋友幫手，但頂還頂，除非新股真係質素好正，否則好多只係盡吓義務頂一日，你唔走就笨。公司上市後有好多好處，所以即使淡市都有人硬着頭皮上市，即使上市後個價散咗都無相干。
疑似政府頂個市
昨日上午個市急回，同內地公佈打假後6月出口數字急跌3.1%有關，午後急抽就同內地個市無厘頭急升有關。睇昨日內地股市，表面上看不到有何好消息，不過上午見出口數唔靚仔都唔跌已有啲怪，頂住頂住唔跌，午後個市突然大幅抽升超過2%！
市傳有一個外號「暴力哥」的神秘大戶在市場上大手掃貨，托住大市。之所以叫「暴力哥」，原因係出手特別重，以狂風暴雨式的大筆掃貨，而且專掃「兩桶油、四大行」等大藍籌。「暴力哥」上日亦曾經在5分鐘內連續掛了18單9900手工行(1398)A股，涉資金共6600萬。至於點解一張單係9900手，唔係齊頭數10000手，原因係滬深交易所允許最大的單筆委託為10000手(100萬股)，佢專登避開唔到上限。咁大手筆托住，再疲弱的大藍籌不得不掉頭向上啦！
值得注意的是「暴力哥」出手都有跡可尋，一般都在接近尾市時段，但有時大市跌穿某關鍵位，就會提前出手(例如昨日就係唔俾跌穿前日收市位1965點)。
究竟「暴力哥」係何許人也？現時仍然係一個謎。不過有市場人士猜測，會唔會係國家隊換個身份出手托市，由於入市手法生硬，托住某一個價位的目標明顯，似係政府行為。始終國家隊身份特殊，太頻密出手救市，會引起市場難以估計的反應，所以就以隱形方法出手啦。若然真係有國家隊托市，咁內地市應該唔會無底深跌啩。
陸羽仁
上一頁 下一頁
金融High Tea 舊文
