金融High Tea——「強」力反彈
2013年7月24日
隨着月尾逼近，加上指數橫行待變，大戶終於出手做嘢，外圍同大陸都有利好因素可以借力，夾咗指數上揚。
港股近日受內地氣氛影響較多，昨日A股造好，恒指大幅高開，內地市場人士認為，A股大漲受多個利好因素提振：首先央行周一公佈金融機構新增外匯佔款，年內首次出現負增長，引發市場猜測央行下調存款準備金率。其次圍繞A股上方的一大陰影──IPO本月底前開閘可能性愈來愈低。第三，基金二季度報告公佈完畢，數據顯示，基金持倉比例下降至2010年三季度以來最低值，加上近日外圍股市及商品市場表現強勢，標普500指數再創新高，紐約金價大漲3.3%，突破1300美元關口，都成為炒上藉口。
保七成夾淡友武器
國際金價大漲，除了理解為美國無咁快收水，中國人民銀行宣佈自7月20日起，進一步推進利率市場化改革，全面放開金融機構貸款利率管制。受此影響，中國對黃金需求的市場預期增強，刺激金價大漲。受金價升至4個月高位帶動，龍頭紫金(2899)急升8%，收報1.77元，招金(1818)升4%，報5.29元，金礦股今年高位跌咗差不多一半，家彈起上來雖然好勁，但相信真係賺到錢者只係好少數。
市場因素以外，昨日傳出總理李克強內部講話，詳盡解釋為何底線7%，除了保就業，還有「確保2020年全面建設成小康社會，實現GDP比2010年翻一番目標，今後幾年經濟年均增長速度，至少要達到6.9%以上，即是話跌穿7%這個底線是不允許，成為大市炒上的政策因素。
市傳的李克強內部講話有三個重點，第一點係確認經濟運行仍處合理區間，上半年經濟運行整體平穩，而且穩中有進；第二點係準確把握宏觀經濟政策框架，繼續實施積極的財政政策和穩健的貨幣政策，同時根據情況變化實時加強針對性措施。最重要，就是着力完成全年經濟社會發展主要任務，今年一定要完成全年發展的主要任務，特別是要完成GDP增長，就業增長和控制物價兩方面核心指標，明確定出不能跌穿7%的底限。
克強經濟學近日成為炒股指南針，由於傳出底限消息，恒指高開後隨A股反覆攀升，尾市升幅一度擴大至548點，收市仍企穩21900上收市。恒指收報21915，大升498點，成為真真正正嘅「強」力反彈。國企指數升365點，成交金額增加至664億元，從暴力哥上周入市護盤到傳出總理有增長底限，顯示中央不會放手任股市同經濟暴跌，睇嚟月底前個市仲有動力向上再衝一浸。
炒股超跌仍掀尋寶
憧憬人行減存款準備金率，內銀股表現省鏡，建行(939)及工行(1398)合共向恒指進貢125點，其他二線內銀股都略見回升。
大藍籌向好，個別股仔趁機爆上，受惠「忍者龜」銷售強勁，彩星系發盈喜，彩星玩具(869)爆升0.43元或29%，收造1.91元；主力投資物業的彩星集團(635)都跟升9%。指數短期尋底，好多股仔早前超跌，好有可能成為尋寶對象，不過大市仲未肯定真正大好，股民刀仔鋸大樹，點都係揀啲有番小小實力者穩陣啲。
陸羽仁
上一頁 下一頁
金融High Tea 舊文
