金融High Tea——使錢抗抑鬱
2013年8月1日
夏日炎炎，今天連投資天氣，似乎都特別翳焗，樓市無成交，股市無得炒，連債市、外幣、黃金都難玩，不少中環茶友都大歎，備受投資抑鬱症困擾。
有錢就身痕，呢個講法除咗形容用情不專的男士外，仲適合用在投資者身上，而且仲係男女合用，絕無性別之分。
今年7月天氣算係近年最清涼，無奈係投資市場則腌悶非常，令大家心頭有火，買又唔係、賣又唔係，行唔安、坐唔落，非常唔老嚟。
好似昨日，個市又係悶局，中央政府派定心丸，定調下半年經濟政策「穩中有為」，恒指最多曾升117點，見22070，但講到底阿爺都唔係話大力谷高經濟，加上市場觀望今晚聯儲局議息，指數在兩萬二關口腳軟，以接近全日低位收市，恒指收報21883，跌70點，成交金額增加至488億元。7月港股成功翻身，恒指累升1080點；國企指數都漲347點。
大行唱淡新盤劈價
有茶友話，通常這種悶局同天氣一樣，有可能係醞釀風暴的先兆，皆因美國成日話退市，雖然暫時仲係出口術，但可以確定一點，就係銀根再無以前咁鬆，再加埋內地由追求增長，變成只係要求保底，令到投資市場一滴風都無，試問投資者仲點可以乘風起航。
不過，現今世界樣樣都轉得快，大環境無得乘風借力，大戶炒家等多兩等，就會諗計搵食，造好唔得，就反手造淡；唱好無人聽，就改口唱淡。
好似樓市咁，交投畀辣招辣到呆晒，經紀無啖好食，地產股都唔上唔落，於是有大行出來做淡友，估計地產商好快會劈價賣樓，新盤定價會平二手樓20%。
根據美銀美林發表的報告，話發展商新盤不斷累積，遲早要減價開售。為咗搶客，好可能會開出比二手樓為低的價錢，估計幅度約為20%。由於現時新盤比二手樓訂價高，若然要劈到比二手樓平20%，新盤價錢可能要一口氣調整30%！
新盤係咪會減咁多，暫時都係聽住先。不過，最近因為同財爺鬍鬚曾口技較勁出晒位的恒隆集團(010)主席陳啟宗，昨日係業績會上被人問到集團手頭咁多錢，會唔會一樣「應使得使」時就答，要等到香港樓市步入比冬天更加凍的嚴冬時，才會買地，因為普通冬天來到時，其他大戶都有很多錢買地，但樓市進入嚴冬或酷冬時，集團就保證會買地，「不過，仲有排」，他亦都不希望看到這個情況。
使錢享受永遠唔會蝕
對於港府會否「撤招」或加推樓市辣招，陳啟宗認為政府短期之內都不會「撤招」，因社會仍有很多聲音希望樓價不再上升；加推辣招機會亦不大，因辣招推出後，成交減少「已經夠辣」，料等到長遠房屋供應追上需求的時候，辣招才會撤銷。
恒隆下半年會否繼續出售上千個貨尾單位，朗尼陳就話不肯定，仲透露恒隆地產去年賣出百多個住宅單位，今年上半年只賣出5個。
恒隆作風一向審慎係人都知，依家樓市「吊吊揈」，朗尼陳仲係繼續等。
普通業主同股民，雖然無佢咁多錢，不過若然買樓係投資，照計而家都唔使咁急，至於想吼地產股，最期待就係發展商真係劈價，到時樓市未冧地產股已先冧，大家到時先執平貨未遲，所以如果而家受投資抑鬱症困擾，最多都係細細注玩吓先，更好辦法就係消費吓散心，咁樣其實唔使得幾多，而且仲係使嚟俾自己享受，點都唔會蝕本喎！
陸羽仁
上一頁 下一頁
金融High Tea 舊文
