金融High Tea——炒反彈吼內房
2013年8月13日
內地股市估佢唔到，上周五公佈利好數據時無升，昨日突然跳升，上證綜指大升2.4%收場，港股跟着起舞，港股早盤還要微幅低開後，後隨A股大幅上升，衝過牛熊線，最後大漲463點收場，升幅為2.1%，報22271點；國企指數升幅更高達3.4%，成交更升至647億。
內地炒救市，例如香港媒體報道，中國政府正在向中國重點城市和省份暗中提供財政刺激，就被內地股民視為好消息，報道指中央透過農業銀行(1288)向上海提供2500億信貸，以幫助上海設立自由貿易區，就係扶持地方經濟的增長的例子。內地市場似乎相信阿爺無辦法睇住經濟跌，點都要救吓。內地股市就出現「煤飛色舞」的現象，之前唔掂的煤股、有色金屬股、材料股炒到停板。香港也跟住炒，周期性板塊備受追捧，煤股以兗州煤業(1171)最突出，升9.9%報6.55元。金屬股亦漲，江西銅(358)升逾7%，紫金(2899)升10.7%，招金(1818)更升17.4%。
內地煤炭價格的確有少少回升跡象，中信證券就認為，即使經濟基本面還有不確定性因素，但對煤價已出現階段性底部的預期已經逐步明朗，近日焦炭、焦煤期貨大幅上漲，主要原因是7月中國貿易資料好於預期，加上受周邊市場大宗商品價格回升帶動，煤炭期貨市場價格上漲，亦有助於改善股票市場對焦煤價格的預期。
煤價回升利炒作
但內地投資界認為經濟尚處於下行通道，要明年、甚至後年才見底，如今「煤飛色舞」的現象，只屬「短期階段性投資」，即係用我的語言所講的「炒作」。你睇紫金、招金大升，乜金價有升咩？金價不同煤價，根本無升，但兩隻金股大炒，只因佢哋跌得太殘，所以追落後。
中環茶友話，恒指回一回又跟內地股上，短期走勢強番，見金屬資源股炒味甚濃，順勢都係向上炒。若大市維持到一段時間，落後的股份會一波一波咁炒，佢比較留意的是內房業。
阿爺要支持經濟，無辦法再打擊樓價，內房業起碼玩多幾個月，下一波若要炒隨時再炒內房。近日各上市內房公司發佈7月份業績。龍頭公司萬科前七個月以976.5億元人民幣(下同)銷售額穩佔第一位。若以全年計，進入千億銷售俱樂部的估計有萬科、萬達、綠地、保利和恒大，而中國海外地產(688)則在8月5日把今年銷售目標由1000億港元上調至1200億港元，約960億元人民幣，亦近千億。
中國海外最近動作多，佢在上周一宣佈其母公司中建股份計劃將其直接經營的中建股份房地產注埋入中國海外。
內房殼唞完有後着
據2012年內地房企銷售排行榜，去年中國海外銷售額為935億元，位居全國第四，而中建股份房地產去年銷售額則為210億元，兩者在去年合計已有1145億元的銷售額，所以兩者合併又會打造出另一隻內房航母。
買內房買中國海外是穩陣之選，唯一唔好處係佢目前反彈到24.1元，幾接近25.6元的52周高位，長揸只能等回落去買。妙就妙在今年千億五強有三隻在港上咗市或插咗旗，隻恒大股價極落後，昨收3.25元，認真低殘，佢被老外質疑帳目有問題後，就一直無好過，加上被視為借貸過高有風險，公司批埋股無人炒更一沉不起。不過若然乜嘢廢股都炒落後，總有一日輪到佢。
有趣是另外兩大都借咗香港殼，萬達借殼恒力(169)，而家連名都改埋萬達商業地產，綠地亦借殼盛高置地(337)，兩隻殼都係喪炒一浸後回落唞緊氣，當然在回吐時去撈有風險，但回完都應該有後着，雖然可能要等長啲，但呢啲內房巨企在內地融唔到資，借殼就係想融資，最終都要做嘢。
陸羽仁
上一頁 下一頁
金融High Tea 舊文
