金融High Tea——追電視股 越位陷阱
2013年10月16日
特區政府決定增發電視牌照，午後消息傳出但又不知花落誰家，三家投牌機構中兩家股價爆晒煙花，王維基的香港電視(1137)最多爆升36%，其後略為回吐，但收市仍急升28.5%；九倉(004)旗下的有線寬頻(1097)最多升過26%，收市仍升20%；只有電盈(008)無乜反應，微升0.6%。
我估市場當時只是想當然，聽到話政府發牌，唔知發畀邊個，最自然想到會發畀王維基和有線，無諗到電盈會中獎，所以撲入去盲炒香港電視和有線寬頻，結果就中招啦，政府在收市後公佈只有電盈和有線中標，王維基中空寶，我估阿基哥隻香港電視不止會跌番昨日升的三成出來，而且會跌凸，佢昨日收3.07元，我估佢連上日收市價2.39元都守唔到。呢個故事教訓大家，炒股不可以想當然，如果只係跟風盲炒，最好都係做即日鮮，唔好冒過夜的風險。
無綫負面未反映
從觀眾角度來說，呢個結果出人意表，因為王維基投資咗3億，請咗幾百人，有啲劇仲放咗上YouTube畀人睇，估唔到佢投唔到牌，反而係比較靜的有線和電盈卻有牌。熟悉香港政經格局的大孖沙教大家睇，家一個係李嘉誠家族的電盈，一個係吳光正家族的有線，若果只有其中一家攞到牌，政府點擺得平佢哋？咁樣唯有叫王維基等亞視2015年到期會放出來的牌照啦。
投到牌係唔係馬上掂，又唔見得，因為未來電視業四國大戰，都唔係話有牌就賺大錢，有線的奇妙電視未來六年營運開支係10億，有6億幾係營運開支，加埋折舊一年開支估計1億幾，雖然呢個銀碼已經係好細投資，搞唔出乜嘢勁嘢，但有線的奇妙電視亦唔易馬上搵番一年1億幾生意，所以搞免費電視初期仍可能要蝕。有線去年蝕2.8億，搞埋免費電視也未必可以馬上減虧。我估有線寬頻今日仲有得炒吓，但高追風險就大。至於電盈，佢話首三年投6億元，一年營運開支起碼要過億，同樣唔係話一做就賺，但電盈昨日無升，今日有升番啲的空間，但同樣唔好高追。
今次發牌對王維基的香港電視最不利，但對電視廣播(511)也負面，佢昨日微跌0.3%，跌得太少啦，佢中期賺7.7億倒退9.4%，現價歷史市盈率12.3倍，雖然王維基無入場，少個人搶藝員，成本無上升得咁快，但多兩個香爐多兩隻鬼，節目點都要落啲本做好啲，在收入方面亦有影響，在競爭下無綫廣告無乜加價空間，電視廣播明年盈利睇跌，所以股價看淡，佢去年賺17.3億，恐怕都見咗歷史高位啦。結論係發多兩個電視牌，但無乜股好炒。
濠賭板塊賭率仍高
大市方面，美國參議院兩黨可能延長國債上限至明年2月，市場憧憬債務問題解決推升港股。恒生指數收報23336，升118點；國企指數收報10671，升90，成交577億元。不過，升勢唔係好集中，藍籌股匯控(005)升0.65元，報85.15元；友邦(1299)創新高，收報38.55元，升0.55元，華創(291)飆1.35元，收報26.8元，是藍籌最強。上周獲瑞信大升目標價的澳門勵駿(1680)，股價又破頂，濠賭股繼續仲係賭率最高的板塊。
陸羽仁
上一頁 下一頁
金融High Tea 舊文
