偷食路邊雞
2013年12月19日
美國公佈議息前，港股已經高開，但升幅仍然受制觀望氣氛，聖誕假前個市開大開細好快揭盅，有無聖誕禮物睇埋呢幾日就有答案。
聯儲局打開謎底前，全球股市都閘定馬步睇伯南克最後表演。美國近日連串數據強勁，令人相信伯老有條件在離任前啟動退市，惟獨係剛公佈的通脹數字仍然溫和，令鴿派仲有理由憧憬量寬再坐一會。
退唔退市唔係最重要
從炒作角度，聯儲局退唔退市唔最重要，最重要係有個答案。呢個世界有樣嘢，叫除死無大害，若然預咗，就連死都唔驚，退市亦有樣，如果大家都預咗退市，咁真係話退咁又點呢？美國佬係咁放水，一早放到係人都驚，佢未退市人人都綁定安全帶，企業唔係加大槓桿猛借錢，而係去槓桿化，所以退市的影響，至少係初期係心理性為主，所以掉轉角度嚟講，聯儲局開完會話退市，唔係壞事。
在伯南克開估前夕，港股高開，雖然升勢唔勁，但多少有點偷步炒上味道。陸羽仁話，息口敏感的地產股，可以當係用來觀察市場對退市消化晒未的「路邊雞」，係揭盅前夕，恒生地產分類指數漲超過1%，跑贏大市，扭轉今個月以來的弱勢，長實以外的地產股表現都唔錯，信置(083) 及新世界發展(017) 分別升1.7%及1.3%，新地(016) 亦升1%。
中環茶友話，本來佢都諗，如果個市跌定先，就會偷雞買吓貨，反正個市調整咁多，再跌吓都會有機反彈啦，唔知係咪咁諗嘅人多，個市拒絕回落，茶友做人一向有宗旨，個市唔跌佢唔入貨，到底佢咁係蝕底定着數，好快就有答案。
昨日最惹人關注係內地公佈樓價數據，今年以來保持一路上升格局。11月數據顯示，70個大中城市住宅銷售價格較上月平均增長0.6%，與10月份比較，平均漲幅收窄0.1個百分點。上漲的城市有68個，升得最多的係北京和上海，分別大漲21.1%和21.9%(不包括保障房)。雖然有人驚樓價升會觸發調控，內房股表現仍算穩陣，佳兆業(1638) 及華南城(1668) 漲超過3%。龍頭股中海外(688) 升0.6%，華潤置地(1109) 漲1.4%。
內房新股好難玩
最近有多家內地房企見香港新股市場回勇，急急南下上市掘金，包括計劃在今個星期五掛牌的龍光地產(3380) ，今年已經有共7隻內地房企來港上市，其餘6隻係金輪天地(1232) 、五洲國際(1369) 、當代置業(1107) 、毅德國際(1396) 、景瑞控股(1862) 及時代地產(1233) 。講到招股同股價表現，就認真麻麻啦，五洲國際公開發售部份只有57%認購，當代置業只有12%，發行價要定在招股價下限。已上市的6隻新股中，只有五洲國際與毅德國際股價高過招股價，其餘全部潛水。
現時香港上市的內房股數數埋埋有40隻，分析認為全國性房企於2009年前已經陸續上市完畢，這類企業市場佈局廣闊，規模較大，風險度較低。剩低的主要係市場集中在三四線城市的中小型房企，呢啲房企業績波動、風險系數高。投資者要求高回報，導致估值進一步下滑，淨資產要大幅折讓才能成功上市，加上海外投資者普遍唔睇好內地房地產市場，新股表現就更難令人滿意啦，抽呢啲新股不如買啲有物業的股仔博賣殼畀內房商仲好過。
陸羽仁
金融High Tea 舊文
