大牛市唔易見
2013年12月09日
美股有時真係估你唔到，之前一直回，話怕11月非農就業人數高會令聯儲局收水，結果上周五公佈11月新增非農業就業職位較上月增加20.3萬個，超過預期的18.5萬，又在20萬這個關鍵水平之上，失業率由7.3%降至7%，亦比預期的7.2%低，但美股杜指無跌反升，大升198點。
美國市場對這個「反常」現象，有不同解讀，有人話美股已打破過去經濟數據好、怕收水、股市跌的魔咒，又有人話啲錢唔買股無處走，亦有人話升一兩日個市可能又怕收水會跌。我就比較信另一市場債市的反應，就業數據雖然咁好，但10年期美債債息2.858厘，無升跌。理論上數據好、收水機會高、聯儲局減買債、債價跌、債息應升，但債息沒有升，皆因之前升得太多，早前由較低的2.6厘又升番上2.85厘，基本上已反映收水機會上升的因素，所以上周五見「好消息」無再升，股市見債息無升，好似無事，就繼續炒。試想若上周五債息大升上3厘，杜指唔跌百幾點就奇啦。股市只怕利息高，債息無升，股市就當無事繼續炒。
07冧市 級級向下
年近歲晚，港股還是反覆向好炒居多，內地開始見明年可能大牛市的評論，本地的網友也有近似的問題，如網友「依家控股」問起︰「從比特幣同內地樓市可以睇到，中國同香港其實資金相當氾濫，只要有人炒好容易就將一樣嘢炒上天。在下在今年年頭問過老師，港股6年出一次牛三大升浪，老師話睇個樣唔似，而事實今年的確冇大升，但在下覺得家的資金供應其實足夠炒出個牛三，關鍵係內地A股唔掂所以拖住咗後腳，唔夠人去炒而已，內地朋友告知，你睇A股個樣死死吓，但其實內地創業板同自貿區相關股都炒到上天，只係香港人唔睇而已。如果係咁，老師覺得A股會唔會復活，跟住炒出個大牛三呢？」
要睇香港會唔會有牛三大升市，要睇內地有無大牛市，內地唔大升，香港好難狂升，而睇內地市既要睇宏觀經濟，也要睇資金供應。回顧過去，內地股市在2007年見咗牛三，上證綜指在2007年10月上到6124點，然後大冧市，一年後在2008年10月插到落1664點的低位，唔見咗73%，係典型的熊市。
上穿高位 才見牛市
到2008年底大放水後，股市反彈，2009年8月衝近3500點回落，但未曾再展開牛市，因為之後幾年每次反彈高位都低過上一次，2010年10月高位3200點，2011年4月高位3000點，2012年2月高位近2500點，2013年2月高位2444點，家2237點，內地股市近一兩年雖然無再試新低，但都只是一個橫行狀況。所以唔好話內地進入「大牛市」，要重新進入牛市，先要一浪高於一浪，明年最好明顯升穿2500點，若能升近3000點，方可以話牛市出現。
技術上睇內地指數的構成，巨型內銀股和三桶油(中石油、中石化、中海油)，又睇唔到佢哋業績大升特升的理由，巨型內銀賺得錢多，但阿爺嫌利息高扼殺各行業，所以有啲想打破內銀的壟斷，雖然估計唔會發生得太快，但係成為內銀頭頂的懸劍，而佢哋未來利潤都不會再大增長。三桶油也如是，油價已高，採油業務難大升，唯一有空間的反而是下游業務，等油價下跌並放開成品油的價錢，成品油零售就會好景，但這樣主要對集中做下游的中石化有利，所以三桶油業績都難齊齊大上。不過大家要明白，唔係公司業績唔大升，股價一定唔升，可以業績普通，股價照升，呢啲就叫做估值上升。
要個市估值上升，一係資金氾濫，一係經濟重拾升軌，令市場對中國經濟前景改觀。先睇番過去幾年中國股市唔得的原因，其實在2008年之前，中國經濟在高速增長中，是粗放成長模式，企業急促膨脹，賺錢容易，所以股市大升。但這個走勢借2008年金融海嘯開始扭轉，經濟快速冷卻，2008年溫總放4萬億出來夾硬救，係一個治標不治本的方法，但你睇2008年、2009年錢咁多，內地股市只係上到3500點、3200點就回，個市最叻都係上番高位一半多啲，就知道有嚴重缺憾在內，亂放水都救唔起，而放水仲放出一個樓市泡沫，到2011年、2012年阿爺焗住收水，企業更難捱。
實質利率 主導後市
那兩年企業盈利本來都增長得唔好，水又緊，做生意更難，中小企有抵押借錢都要10厘，無抵押借到20厘，有錢真係「放數好過炒股」，炒乜嘢股可以一年硬收10幾%回報(無抵押或高風險可以唔借)？
專業啲去講，實質利率高企，股票就難炒。實質利率係名義利率減通脹，過去兩年中央大力拉低通脹，但利息無降低，即係實質利率上升咗，資金唔係鬆咗，係緊咗。
網友「依家控股」話內地水多，其實水多水少是相對唔係絕對，係相對的。當你借錢的利息咁貴，就知道內地資金並沒有想像那麼氾濫，要炒起好少人炒的比特幣，或者炒起生薑大蒜易啲，因為那些市場比較細，要炒起每天成交千幾億的股市，資金量要大好多。
再加上外資睇宏觀經濟，佢哋呢一兩年都見中國經濟放慢，都好驚內地會硬着陸，所以內地股票市盈率雖低，上市公司唔係賺唔到錢，但外資仍然無興趣，怕會再大跌。加加埋埋，在過去兩年，無論宏觀氣候和資金供應都不利股市。
如今有少少改變契機，習主席上台一年，經濟增長開始穩住，有機會扭轉增速不斷放慢的勢頭，而十八屆三中全會推改革措施，令人憧憬中國經濟未來可以享受「改革紅利」。未來一年，既要看經濟增長能否保住向上勢頭，也要看改革措施如何落實，若兩者皆理想，可能可以在內地A股市場及香港H股市場體現出來，而內地股市轉向牛市的首要表徵，是向上突破呢兩年的高位。我認為要有大牛市不容易，主要是資金供應不能太鬆，未來存在兩個可能，第一是保持過往兩年的牛皮上落市，第二是開始出現反覆向上的小牛市，出現小牛市的機會稍高一點。所以可以睇好少少，但不宜睇得太好。
瑞信很牛 國指萬五
家外資對中國股票都樂觀了，例如瑞信就特別睇好H股，瑞信發表報告稱，預期明年A股會跑贏恒指，而H股又跑贏A股。該行指恒生指數有望升至27000點，較目前約有14%潛在升幅，相當預測明年市盈率10倍；佢哋估上海A股目標位2700點(上海A股指數現在是2341點，比上證綜指2237點稍高)，上漲空間20%，相當預測明年市盈率12.5倍；但預期國企指數目標為15000點，上漲空間32%，相當預測明年市盈率10倍。
瑞信中國證券研究主管陳昌華指出，過去數年中國市場被調低估值，主要受累於經濟增長出現結構性減慢及金融體系風險上升，過去一年只有與經濟周期關聯度較低的互聯網和必須消費股能夠跑贏大型國企指數。不過，隨着十八屆三中全會推出的全面經濟改革落實，有助推動股市上升。
陳昌華認為未來港股會差過中資股，雖然香港本地地產股經過之前調整後，股價並不昂貴，但美國可能縮減買債規模，仍將困擾地產股表現，加上澳門賭業及本港消費行業今年以來已經表現強勁，推高基數，港股來年難以再有優於H股的表現。
該行建議投資者增持銀行、多元化金融、保險、能源和非必需消費行業，策略上認為神華(1088) 、中國太保(2601) 、工行(1398) 和百麗(1880) 的表現將優於大市。同時建議減持必需品消費、工業、資訊科技、電訊和公用板塊，包括交行(3328) 、新奧能源(2688) 、中國燃氣(384) 、華能國際(902) 、招金礦業(1818) 、鞍鋼(347) 、兗煤(1171) 、中遠洋(1199) 等等。
瑞信講的個股建議可以參考，但H股的目標就比較進取，若A股只有2700點，國企指數不易去到15000點，但明年國指數跑贏恒指的機會不低，買股都係偏重國企好啲。
陸羽仁
金融High Tea 舊文
