中環在線：大家樂搞饑饉賣半盒飯籌款 - 李華華
■羅開光(左)與趙煥明握手合作，希望是次活動籌得善款令人滿意。朱永倫攝
曾因扣飯鐘錢而被指為無良僱主嘅大家樂(341)，近年積極洗底。公司宣佈，今日至4月16日起30日內，全線大家樂將會推行名為「饑饉三十」活動，最保守估計可以籌到總數50萬元「膳款」畀宣明會，支持佢哋喺非洲嘅扶貧計劃。
按照計劃，凡於午飯時段(早上11時至下午2時)以34元購買大家樂嘅「厚切一哥焗豬扒飯」或全新產品「芝士肉醬焗飯」，可以揀「全饑饉」，即全份唔食，將34蚊全數捐出，大家樂會免費送一杯飲品，仲有一條宣明會出品嘅紀念手帶；或者可以揀「半饑饉」，即食半盒飯，捐17蚊。
其實香港地好多女士為瘦身，好多時都食唔曬成個飯，如果食一半又可以做善事，唔使做「大嘥鬼」都真係唔錯。宣明會總幹事趙煥明話，𠵱家全球平均每8人就有1人要長期捱餓，所得嘅「膳款」會用嚟為非洲國家如津巴布韋、安哥拉等地區，幫當地農民進行水利耕作等計劃。
之不過，50萬元好似唔係幫到好多咋喎，大家樂首席執行官羅開光就話，「其實50萬只喺最保守嘅估計，除番開34蚊，150幾間分店，30日，每日只係賣出約5份全饑饉餐就達標，相信以香港人嘅善心絕對唔止嘅。」佢會身體力行，饑饉一半(即15日)以示支持。
羅開光預告加價幅度不大
講番整體生意，羅開光好坦白咁講，由於食材價格同租金上升，好難唔調整價格，但就唔會多，舊年都係低於1%，「始終快餐最緊要喺抵食！」此外，羅開光話，𠵱家仲欠800至900個人手，前線最缺人，佢唔透露會否加人工請人，只係話最重要令員工覺得有晉升前景雲雲。
李華華
mailto:LiWaWa@AppleDaily.com
■相信半份「焗豬」對不少OL來講份量剛剛好。
上一則: 產能趨平衡理文看好前景
下一則: 中環在線：青姐冧莊代言勝在夠誠懇 - 李華華
中環在線 - 李華華 舊文
