巴菲特指標
2014/3/18 上午 09:31:37
網誌分類: 經濟
股市炒超前，烏克蘭克里米亞在入俄公投前股市好似世界末日，到壞消息兌現後，股市反而無嘢，杜指早前連跌5日後，昨日大漲182點。
克里米亞公投結束，結果一如所料，以壓倒性的97%選票支持脫烏入俄，克里米亞政府隨即宣布獨立並正式申請加入俄羅斯聯邦。
克里米亞係俄羅欺黑海艦隊的駐軍基地，係進入黑海及地中海的出口，對俄羅斯太重要啦，美國歐洲用經濟制裁威脅，普京一於好少理，公投照搞，仲發總統令宣布接受克里米亞加入俄羅斯聯邦。大局趨定，美國除咗唔承認公投，以及搞所謂小規模制裁，凍結某些公投搞手的資產之外，(包括普京助手，但好奇怪又唔敢直接鬱普京)市場睇唔到美國有乜可以再做。市場投資氣氛反而好番啲，歐美俄股市齊齊反彈。法國及德國股市彈約1.4%，俄國股市勁彈3.6%。
美股亦反彈約1%，杜指漲182點至16247點；標普500指數升18點，收報1859點。俄烏關係動蕩以及中國經濟增長擔憂，令到美股上周出現1月下旬以來，表現最差的一周。標普500指數下跌2%，抹去了全年升幅。昨日至有番啲似樣的反彈。
有投資者問，依家係唔係時候入市呢？昨日有分析用「巴菲特指標」睇現時係唔係入市時機。巴菲特在 1999 年及 2001 年接受《Fortune》專訪時，提出了一套他用來判斷市場係便宜抑或太貴。主要係比較上市公司股票總市值佔國民生產總值 (GDP) 的比重。如果佔比係70至80%，就是非常正的入市時機，如果高達 200%，像 1999 年及 2000 年的科技泡沫，入市同跳火坑差唔多。
今年 2 月底，世界交易所聯盟 (World Federation of Exchanges) 公佈資料，美股市值為 24.6 兆美元。之後跌番約1%，大約係24.4兆美元。美國最新的GDP數字，要到 3 月 27 日才會公佈，不過，初步估計2013 年GDP大約係17兆美元，「巴菲特指標」就係約140%，市場略被高估，但又未到爆煲地步。
測市場泡沫而聞名的著名基金經理人Jeremy Grantham接受巴倫周刊採訪時表示，睇法差唔多，佢認為目前美股被高估程度是65%，現在還稱不上泡沫，投資機會還很多。按佢嘅計算，標普500指數要去到約2350點水平，至算係到達泡沫區，這意味着美股至少仲有30%的上升空間。
佢又話從投資者行為是否瘋狂也可以判斷依家市況危唔危險。2000年股市瘋狂的時候，波士頓人喺餐廳睇嘅都係股市訪談節目，無人睇球賽，現時仍未見呢種情況。
目前只有機構投資者、特別是對沖基金比較熱衷股市，散戶因為在2009年的股災受傷程度要比機構嚴重的多，所以仍然比較謹慎。回顧歷史，每一次泡沫都是以散戶們瘋狂湧進股市時見頂。但很明顯，現在散戶們還沒有類似的舉動。
陸羽仁
回應(7) 我想回應
陸羽仁 BLOG 舊文
