青心直說：蠱惑仔大鬧天宮 - 胡孟青
■阿里巴巴的創辦人馬雲，筆者對其過往的財技手段，不敢恭維。美聯社
見微知著，區區6,500蚊，亦可以睇清楚一個人，最值回票價者，仲係睇完可以原銀奉還，點講都真係抵到爛！
一知半解最危險，唔熟悉阿里巴巴的財技史者，就會奉雲為神，覺得人家放棄來港IPO係香江之損失。
但翻查狂人在2009年6月至2010年8月之間，曾將集團核心資產「支付寶」，靜悄悄低價從集團轉移至自己名下私人公司，成功切斷另外兩家加起來持股70%股權的主要股東——雅虎和軟銀與支付寶之連繫，罔顧雅虎的知遇之恩。若非2005年雅虎以10億美元加雅虎中國權益，變相放棄開發內地市場，收購集團40%股權，2003年才成立的淘寶網，會迅速壯大成為中國最大互聯網公司，打敗eBay易趣嗎？
狂人手段惹質疑
呢個世界，唔係識講多兩句英文，就可以不可一世，果然係典型土豪蠱惑仔，頭搖又尾擺，飄移境界。
處心積慮，到了2011年一切米已成炊，東窗事發，才再與兩大股東左拆右拆博擺平，觸發雅虎面對多宗股東起訴周身蟻，令當時雅虎股價在短短一個月內插水四成。
須知道支付寶一直是集團核心資產，惹來另一位胡小姐——朱鎔基愛將胡舒立看不過眼，罵馬雲踐踏契約、破壞市場經濟精神。
愛是盲目的，難得內地粉絲仍然覺「偷雞有理」，更謂狂人捍衞國家金融主權有功，更罵胡是中了西方資本主義社會的毒呢。
如今，狂人要走進最資本主義掛帥的大本營上市，不嫌棄美國對中資企業財務數據百般懷疑，粉絲可又會勁讚狂人一雪八國聯軍之前恥呢？
見證歷史事實，連雅虎都唔夠狂人玩，難道香江股民有特異功能，可以打敗曾經以持股少少竟成功偷天換日、隔空取物的大盜？醒醒吧！
胡孟青
獨立股評人
上一則: 財智語陸：阿里美掛牌非壞事 - 陳永陸
下一則: 金手指：騰訊信達的啟示 - 孫柏文
青心直說 - 胡孟青 舊文
