金手指：騰訊信達的啟示 - 孫柏文
■當年雷曼爆煲，個市都要六個禮拜後先見底，筆者認為，散戶現時都係要睇定啲先。資料圖片
股價，理論上應該係攞嚟反映該股未來有嘅賺錢能力。例如，若有一事件發生，事前冇人預料到，之後又被大肆宣傳，理論上係會利好某間上市公司嘅未來盈利，該股嘅股價就應該上升。起碼教科書係咁教。
咁現實世界係咪咁呢？除非你係學者，當然對眼就係證據，答案就一定唔係咁簡單。多唔使講，上周有兩段新聞，應該會令某啲股票上升，又令某啲股票跌。
第一段，就係啲科技公司例如騰訊(700)被叫停啲虛擬信用卡等業務。以啲科技公司嘅政策走勢，呢段新聞係喺預期外，咁騰訊之後跌鑊金，好正常。問題係，應該受惠嘅內銀呢？佢哋仲唔扭轉政策上節節敗退之勢，仲唔升？點知都係跌。
第二段，就係大陸未試過有產品、債券爆煲，卒之真係有嘢爆，唔還錢，有產品投資者卒之要輸錢。就係因為呢段新聞，孫柏文上周就叫大家「不問價追信達(1359)」，因呢間公司專做壞賬生意，雖然個個都話大陸會有萬億計嘅產品壞賬出現，要去到上周先真正第一次有。
同日，我見「趣BLOG BLOG」嘅股榮兄喺「蘋果即時新聞」反駁，叫「不問價沽信達」。佢話沽信達嘅理由係佢盤數唔靚，就算生意多咗，盈利唔升。不過我計過有咁嘅情況，係因信達舊年接嘅壞賬，都係再之前阿豬、阿狗都能借新錢還舊債嘅年代出事，可想啲壞賬一定係垃圾中之垃圾。而家有產品爆，就應該令系統有大震盪，而系統越不穩，壞賬就會越抵買，令信達之前幾水皮都好，未來嘅盈利會好好多。所以亦令我企硬。點知，信達由建議嗰日開市價到噚日收市，跌一成。
大市陰陽怪氣宜觀望
個市陰陽怪氣，啲錢嘅來去難捉摸。大陸因產品、企債爆煲，令影子銀行系統資金流減慢咗幾多，都係未知。而最終幾時瞓身入市？當年雷曼爆，個市都要六個禮拜後先見底，大家都係要睇定啲先。
孫柏文
獨立股評人
http://facebook.com/shuen
本欄逢周二刊出
上一則: 青心直說：蠱惑仔大鬧天宮 - 胡孟青
下一則: 一周兩件：亨泰潛質未展露 - 錢雋
金手指 - 孫柏文 舊文
