青心直說：狂人永冇益人 - 胡孟青
■筆者批評紐交所見錢眼開，只憂花旗國飲唔慣國產奶媽嘅奶。路透社
有本地股民曾經大庭廣眾被打荷包，過了幾年後，竟然有人扮公安執番個荷包原璧歸趙，一個崩都沒有少。冇損失，以為皆大歡喜，不過，唔知佢原來已經睇清曬你係二仔底，人家當年淨係將啲唔值錢嘅B2B掟出嚟，你哋班友就《家有囍事》吳君如上身，嗒曬糖，不是嗎？IPO價13蚊抽唔到，仍要前仆後繼，40蚊一股去搶住坐艇等見6蚊，簡直笑死佢哋喇！狂人精神、永冇益人。似乎大家都太善忘了！
諗返轉頭，有理由懷疑2007年嘅海市蜃樓「港股直通車」，根本就係齋開畀佢食住個勢完成上市就煞停的特別班次專用列車。
小股民你懂的
見錢開眼嘅納交所、紐交所，何不易名濫交所！有奶便是娘，本屬無可厚非，總好過斷奶餓死，只憂花旗國未必飲得慣國產奶媽嘅出品，問世間，骨氣是何物？「有骨氣集團」都摺埋咗好耐啦！如果香江孖屐中人個個都咁有骨氣，就唔會通街垃圾新股合唱團、巡迴表演𠱁阿婆坐艇啦！不要忘記，花旗國出名律師多，排住隊隨時候命，鬱啲都玩集體訴訟大龍鳳，好歹贏輸都陪你賭一鋪，為濫交後遺症補鑊；不然，每兩百人民就有一個律師為人民服務的美國，何來養得起咁多律師？香港呢？問嚟都多餘，你死你事囉！幾多停咗牌N年嘅殭屍股，就算最終得以成功借屍還魂，投資者又係一樣冇仇報！
半年前懶口響話上市對佢哋唔重要，而家還不是一樣要擒擒青搶錢！
文人自然多辯駁，在旗下即時通訊軟件「來往」的「紮堆」中，提到「改變一個人很難，改變成功人士更難……」查實本地媒體又何必想得太多，監管機構亦不需要對號入座，因為這可能是有人因香港不賣賬傷心過度自言自語，有感而發，自我訓斥一下而已，已經賺都盤滿缽滿，改邪歸正？發財立品？儍的嗎！小股民！你懂的！
胡孟青
獨立股評人
上一則: 財智語陸：瘋炒後仍要睇盈利 - 陳永陸
下一則: 投資一周：問貼士怎拆招 - 周顯
青心直說 - 胡孟青 舊文
