一路彈
2014/3/19 8:44:9
網誌分類: 經濟
美股繼續實現壞消息已反映繼續彈的心情，懶理俄羅斯克里姆林宮宣佈，從昨日簽署條約開始，克里米亞已經納入成為俄羅斯的一部份(呢個就係所謂Annex, 即「納入」)。之後，普京稱俄羅斯只係要攞番克里米亞，(1955年蘇共總書記克魯曉夫將克里米亞送咗俾烏克蘭。)並無意分裂烏克蘭。普京係咁依出吓口術，已緩解了投資者對俄烏關係的擔憂。
外擾消除，美國經濟又有唔錯消息出台，2月新屋開建90.7萬幢，符合預期，而營建許可則達到101.8萬幢，遠好過預期的96萬幢，預示美國春季地產市道，將會轉旺。
投資者風險胃納提高，股市恐懼指標VIX指數跌番落去14點水平，美股跟住歐洲第二日炒高，杜指漲89點至16336點；標普500指數升13點，收報1872點；納指乘住阿里巴巴將會登陸美國威勢，表現跑贏大市，大漲53點，造4333，漲幅1.%。
阿里巴巴去年開始與港交所傾上市問題，香港監管規定上市公司「同股同權」，而阿里巴巴則堅持「合夥人」制度，即持股約10%至13%的創辦人馬雲及其高級僱員，可以保留對董事會組成的控制權，結果傾唔埋欄。阿里巴巴日前宣布決定放棄香港，移師到美國上市。
市場估計，是次集資金額將達到100億到150億美元，係繼Facebook兩年前上市以後，美國最大規模的互聯網企業IPO。阿里巴巴現正與美國包括瑞信、高盛等六家銀行安排傾承銷細節，預計於4月正式上市。美國的投行今次都好肥仔，承銷費用達到2.6億美元。
有分析員指阿里巴巴今次上市選美棄港，美國好似贏咗香港一仗，其實唔係。只係香港唔要呢筆生意，美國執口水尾而已。而香港之所以輸，可以話輸在制度唔夠彈性，亦可以話係有底線。如果香港俾阿里巴巴咁上市，亦應該俾番怡和用AB股的制度上市，因為道理好簡單，怡和都係以佔股權比例少、但投票權大的A股，控制成間公司。
上周五我話趁低吸，主要睇到美股杜指沽烏克蘭克里米亞事件跌得過籠，會有反彈，當時杜指跌到16109點，而家16336點，已反彈了1.4%。美股反彈力大，昨天港股彈力一般，要睇睇呢兩日港股有無力上番。牌面睇港股受制內地股市，特別係人仔走弱，更影響投資氣氛。小心美股大彈，港股只是少彈，到美股彈完回頭，我地到時又跟。
陸羽仁
回應(0) 我想回應
陸羽仁 BLOG 舊文
